කොළඹ මාලිගාකන්ද අධිකරණය අසළ දී අද (14) පස්වරුවේ වෙඩි තැබීමක් සිදු වුණා.
මෙම වෙඩි තැබීමෙන් කාන්තාවක් බරපතළ තුවාල ලබා ප්‍රතිකාර සඳහා කොළඹ ජාතික රෝහලට ඇතුළත් කර ඇති බවයි තොරතුරු වාර්තා වුණේ.
මෙලෙස තුවාල ලබා ඇති කාන්තාව නිලුකා දිල්හානි නැමැති කොළඹ 13 ප්‍රදේශයේ පදිංචි වයස අවුරුදු 40ක තැනැත්තියක් බවයි පොලිසිය සඳහන් කළේ.
මෙම කාන්තාව තවත් ඥාතී කාන්තාවක් සමඟ අද (14) අධිකරණයට පැමිණ ඇත්තේ ඊයේ දිනයේ අත්අඩංගුවට ගැනුණු සිය සැමියාගේ නඩු කටයුත්තක් වෙනුවෙන් බවයි තොරතුරු වාර්තා වන්නේ.
එහිදී සැමියාට අධිකරණයෙන් ඇප ලබාදීමෙන් පසු මොවුන් තිදෙනා අධිකරණයෙන් පිටතට පැමිණි අවස්ථාවේ දී ස්කූටර් වර්ගයේ යතුරුපැදියකින් පැමිණි නාඳුනන පුද්ගලයින් දෙදෙනෙක් මෙම වෙඩි ප්‍රහාරය එල්ල කර තිබෙනවා.
වෙඩි ප්‍රහාරය එල්ලවනවාත් සමඟ ඇප ලබා පැමිණි පුද්ගලයා එම ස්ථානයෙන් පළාගොස් ඇති අතර, වෙඩි ප්‍රහාරය ඔහුගේ බිරිඳගේ උදර ප්‍රදේශයට එල්ල වී ඇති බවයි පොලිසිය පැවසුවේ.
පොලිසිය සැකපළ කරන්නේ ඇප ලබා පැමිණි පුද්ගලයා ඉලක්ක කරගෙන මෙම වෙඩි තැබීම සිදුකරන්නට ඇති බවයි.
වෙඩි තැබීමට හේතුව පුද්ගලික ආරවුලක් බවට සැක කරන බවයි පොලිසිය වැඩිදුරටත් සඳහන් කර සිටියේ.
