වඩා හොඳ රාජ්‍යයක් ගොඩනඟමින් සියලු පුරවැසියන්ට මීට වඩා හොඳ ජීවිතයක් ලබාදීමේ කාර්යයේ දී මාධ්‍ය එහි පිටස්තරයන් නොව එහිම කොටස්කරුවන් ලෙස තමන් සලකන බව ජනාධිපති අනුර කුමාර දිසානායක මහතා ප්‍රකාශ කළා.
ඊයේ (05) ජනාධිපති කාර්යාලයේ දී විද්‍යුත් මාධ්‍ය ආයතන ප්‍රධානීන් සමඟ ජනාධිපතිවරයා සිදු කළ සාකච්ඡාවකදියි හෙතෙම මේ බව අවධාරණය කර ඇත්තේ.
ජනතාව යහපත් දේශපාලන සංස්කෘතියක් අපේක්ෂා කරන බවත්, ඒ වෙනුවෙන් ඔවුන් වත්මන් රජය පත් කර ගත් බවත් ජනාධිපතිවරයා අවධාරණය කර තිබෙනවා.
එම නව දේශපාලන, සමාජ සහ ආර්ථික වෙනස රට තුළ ඇති කිරිමට එක් වන ලෙසයි සියලු මාධ්‍ය ආයතනවලින් ජනාධිපතිවරයා ඉල්ලා ඇත්තේ.
දේශපාලන සහ ආර්ථික කරුණුවලට අදාළව ඕනෑම අවස්ථාවක ආණ්ඩුව ප්‍රශ්න කිරීමට හෝ විවේචනය කිරීමට මාධ්‍යයට කිසිදු බාධාවක් නොමැති වුව ද ජාතික ආරක්ෂාවට හානිදායක වන අසත්‍ය තොරතුරු වාර්තා නොකරන ලෙස ද ජනාධිපතිවරයා මාධ්‍යයෙන් ඉල්ලා සිටියා.
රටක් ලෙස දශක ගණනාවක යුද්ධයකට මුහුණ දුන් බව සිහිපත් කරමින් නැවත කිසිසේත් ජාතිවාදයට ඉඩ නොතබන බව ද හෙතෙම අවධාරණය කරමින් පැවසුවේ; ජනමාධ්‍ය නිදහස කිසිදු අයුරකින් අඩපණ කිරීමට හෝ කප්පාදු කිරීමට සූදානම් නැති බවයි.
