භාෂා පරිවර්තන රැකියාවක් ලබාදෙන බවට හා එම රැකියාව තුළින් උපයන මුදල් තැන්පත් කිරීමට එක්සත් ජනපදයේ බැංකු ගිණුමක් ආරම්භ කළ යුතු බවට පවසා පෞද්ගලික බැංකුවක හිටපු නිලධාරියකුගෙන් රුපියල් 2,459,714ක් මුදලක් කිසියම් පුද්ගලයකු විසින් වංචා සහගතව ලබාගෙන ඇතැයි කියන සිද්ධියක් සම්බන්ධයෙන් විමර්ශනයක් ආරම්භ කර ඇති බව පරිගණක අපරාධ විමර්ශන අංශයේ සමාජ මාධ්‍ය අපරාධ විමර්ශන ඒකකය කොළඹ ප්‍රධාන මහේස්ත්‍රාත් තිළිණ ගමගේ මහතා වෙත අද (21) දැනුම්දුන්නා.
පිටකෝට්ට ප්‍රදේශයේ පුද්ගලයෙකු කරන ලද පැමිණිල්ලක් අනුව මෙම විමර්ශන ආරම්භ කර ඇති බව ද විමර්ශන නිලධාරීහු අධිකරණයට දන්වා තිබෙනවා.
සිද්ධිය සම්බන්ධයෙන් කරුණු දක්වමින් එම විමර්ශන නිලධාරීහු අධිකරණය හමුවේ කියා සිටියේ පැමිණිලිකාර පුද්ගලයා මෙරට පෞද්ගලික බැංකුවක සේවයෙහි නිරතව සිට මේ වනවිට ඉන් ඉවත්ව ඇති බවයි.
භාෂා පරිවර්තන නිලධාරීන් බඳවා ගන්නා බවට වෙබ් අඩවියක පළ කර තිබූ දැන්වීමක් අනුව පැමිණිලිකාර පුද්ගලයා එම විද්‍යුත් ලිපිනය ඔස්සේ ඒ සඳහා ඉල්ලුම් කර ඇති බවත් ඒ අනුව ඔහුව ඒ සඳහා තෝරා ගත් බවට අදාළ වෙබ් අඩවිය පළ කළ පුද්ගලයා පැමිණිලිකරුට දැනුම් දී ඇති බව ද විමර්ශන නිලධාරීහු අධිකරණයට දැනුම්දුන්නා.
ඒ අනුව එක්සත් ජාතීන්ගේ සංවිධානයට අයත් බව කියන පිටු 71 න් යුත් ලිපියක් සිංහල භාෂාවට පරිවර්තනය කර දෙන ලෙසට අදාළ වෙබ් අඩවිය මගින් පැමිණිලිකාර පුද්ගලයාට විද්‍යුත් ලිපිනයක් ඔස්සේ දැනුම් දී ඇති බවද විමර්ශන නිලධාරීහු අධිකරණයට දැක්වූ කරුණුවලින් හෙළි ව තිබෙනවා.
පැමිණිලිකරුගේ වැටුපට අදාළ මුදල් තැන්පත් කිරීම සඳහා එක්සත් ජනපදයේ බැංකු ගිණුමක් ආරම්භ කළ යුතු බවට කිසියම් කාන්තාවක් පැමිණිලිකරුට දුරකථන ඔස්සේ ඇමතුමක් ලබා දී පවසා ඇති බව ද ඒ අනුව පැමිණිලිකාර පුද්ගලයා ඔවුන් ලබා දුන් ගිණුමකට අවස්ථා කීපයක දී රුපියල් 2,459,714 ක මුදලක් තැන්පත් කර ඇති බව ද විමර්ශන නිලධාරීන් අධිකරණයට දැනුම්දුන්නා.
පැමිණිලිකාර පුද්ගලයා එසේ මුදල් තැන්පත් කළ ද ඔහුගේ කාර්යයට අදාළ වැටුප් හෝ ලිපි පරිවර්තනය කිරීමට අදාළ වැටුප් ලබා නොදී වංචාවක් කර ඇති බව ද පරිගණක අපරාධ සමාජ මාධ්‍ය විමර්ශන අංශය අධිකරණයට දැනුම්දී ඇති බවයි දසත අධිකරණ වාර්තාකරු පැවසුවේ.
මෙම සිද්ධිය සම්බන්ධයෙන් සිදු කරන විමර්ශන සඳහා පැමිණිකාර පුද්ගලයා මුදල් තැන්පත් කළ බැංකුවලින් වාර්තා ලබාගැනීම සඳහා නියෝගයක් ලබාදෙන ලෙසට එම විමර්ශන අංශය කරන ලද ඉල්ලීමකට අධිකරණයේ අවසරය හිමිවුණා.
