ශ්‍රී ලංකා ක්‍රිකට් කණ්ඩායමේ තුන් ඉරියව් ක්‍රීඩක වනිඳු හසරංගට නවසීලන්තයට එරෙහි එක්දින තරගාවලිය අහිමි ව තිබෙනවා.
ශ්‍රී ලංකා ක්‍රිකට් අභ්‍යන්තර ආරංචි මාර්ග තහවුරු කරන්නේ වනිඳු හසරංග ඊයේ (10) නිමාවට පත් වූ කිවියන්ට එරෙහි දෙවැනි හා අවසන් පන්දුවාර 20 තරගයේ දී සිදු වූ පාදයේ ආබාධයකට ලක් වීම මීට හේතුව බවයි.
වනිඳු ඊයේ පැවති පන්දුවාර 20 තරගයේ දී කිවියන්ට එරෙහිව විශිෂ්ට පන්දු යැවීමක නිරත වුණා.
ඔහු ලකුණු 17කට කඩුලු 04ක් බිඳ දැමුවා.
වනිඳු නවසීලන්තයට එරෙහිව පැවති පන්දුවාර 20 තරගාවලියේ කඩුලු 06ක් ලකුණු 25කට දවා ගැනීමෙන් තරගාවලියේ වීරයා සම්මානයට ද පාත්‍ර වුණා.
වනිඳු ඊයේ සිය තෙවැනි පන්දුවාරය ක්‍රියාත්මක කරන මොහොතේ දී පාදයේ ආබාධයට ලක් වූ අතර ඔහුට නියමිත පන්දුවාර 04 අවසන් කරමින් හෙතෙම ක්‍රීඩා පිටියෙන් ඉවත් කිරීමටත් නායක අසලංක කටයුතු කළේ ආබාධය උත්සන්න වීම හේතුවෙන්.
එබැවින් අනිද්දා (13) දිනයේ දී දඹුල්ලේ දී පස්වරු 2.30ට ආරම්භ වීමට නියමිත කිවියන්ට එරෙහි තරග 03කින් සමන්විත එක්දින තරගාවලියට ම වනිඳු හසරංග එක් නොවනු ඇති.
