මැතිවරණ නීති උල්ලංඝණය කිරීම් සම්බන්ධව මැතිවරණ අපේක්ෂකයින් 11 දෙනෙක් අත්අඩංගුවට ගෙන ඇති බව පොලිසිය පවසනවා.
පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව සඳහන් කළේ පාර්ලිමේන්තු මැතිවරණයට අදාළව පොලීසියට මේ වන විට පැමිණිලි 340ක් ලැබී ඇති බවයි.
මේ අතර මැතිවරණ නීති උල්ලංඝණය කිරීම් සම්බන්ධව අත්අඩංගුවට ගෙන ඇති සමස්ථ පුද්ගලයන්ගේ සංඛ්‍යාව 364ක් බව ඔහු වැඩිදුරටත් පැවසුවා.
අද (08) පස්වරුවේ පැවැති මාධ්‍ය හමුවකට එක් වෙමින් පොලිස් මාධ්‍ය ප්‍රකාශකවරයා මෙම කරුණු අනාවරණය කළා.
මේ අතර වාහන 94ක් ද පොලිස් භාරයට ගෙන ඇති බවයි ඔහු මෙහිදී සදහන් කර සිටියේ.
මේ අතර පෝස්ටර් දසලක්ෂ හැත්තෑ දහසකට වැඩි ප්‍රමාණයක් ඉවත් කර ඇති අතර, නීති විරෝධීව රැගෙන ගිය පෝස්ටර් පන්ලක්ෂයකට ආසන්න ප්‍රමාණයක්ද, පොලිස් භාරයට ගෙන තිබෙනවා.
ඊට අමතරව බැනර් 855ක් ඉවත් කර ඇති අතර, කටවුට් 1,010ක් ඉවත් කිරීමට සහ තවත් 1,322ක් පොලිස් භාරයටත් ගෙන ඇති බවයි වාර්තා වුණේ.
