බූස්ස අධි ආරක්ෂිත බන්ධනාගාරය තුළ කළ හදිසි සෝදිසි කිරීමක දී ඉතා ඉහළ වටිනාකමක් ඇති ජංගම දුරකථන ඇතුළු උපාංග විශාල ප්‍රමාණයක් හා හෙරොයින් හා අයිස් මත්ද්‍රව්‍ය තොගයක් පොලිස් විශේෂ කාර්ය බලකායේ අත්අඩංගුවට ගෙන තිබෙනවා.
තොරතුරු වාර්තා වන පරිදි මෙම වැටලීම සිදු කර ඇත්තේ; විශේෂ කාර්ය බලකාය බූස්ස බන්ධනාගාර කඳවුරේ නිලධාරීන්ට ලද තොරතුරකට අනුවයි.
මෙම වැටලීම බූස්ස අධි ආරක්ෂිත බන්ධනාගාරයේ පැරණි අංශයයේ A,B,C හා D යන වාට්ටු තුළ සිදු කර තිබෙනවා.
එහි දී ජංගම දුරකථන 11 ක්, සිම්පත් 13 ක්, චාජර්, පොකට් රවුටර්, අමතර බැටරි, ඩේටා කේබල්, ඇඩප්ටර් හා තවත් උපකරණ සමග හෙරොයින් ග්‍රෑම් 03යි මිලිග්‍රෑම් 150ක්, අයිස් මත්ද්‍රව්‍ය ග්‍රෑම් 01ක්, දුම් කොළ කැබලි සොයාගෙන ඇති බවයි පැවසෙන්නේ.
පොලිස් භාරයට ගත් නඩු භාණ්ඩ වැඩිදුර විමර්ශන කටයුතු සඳහා බන්ධනාගාර පාලනාධිකාරිය වෙත භාරදීමට කටයුතු කර තිබෙනවා.
