ශ්රී ලංකාවට පැමිණීමේ අරමුණ කුමක් ද යන්න පැහැදිලිව කටුනායක ගුවන් තොටුපොළ ආගමන විගමන නිලධාරීන් හමුවේ අනාවරණය කිරීමට අපොහොසත් වූ සැකකටයුතු විදේශිකයන් දෙදෙනෙක් ඔවුන් පැමිණි ගුවන් යානයෙන් ම ආපසු පිටුවහල් කිරීමට ආගමන විගමන නිලධාරීන් ඊයේ (19) රාත්රියේ කටයුතු කර තිබෙනවා.
මෙම සැක කටයුතු විදේශිකයන් දෙදෙනා පෙනුමෙන් චීන ජාතිකයන්ගේ හැඩහුරුකමින් යුතු වූ අතර, ඔවුන් සන්තකයෙහි වූ චීන ජාතික ගමන් බලපත්රවල ඔවුන් උපන් ස්ථානය ලෙස චීනයේ ප්රදේශයක නමක් සදහන් වී තිබූ බවයි වාර්තා වන්නේ.
මීට අමතරව කාම්බෝජ සහ තුර්කි ජාතික සත්ය ගමන් බලපත්ර ද (Genuine Passport ) ඔවුන් සතුව තිබී ඇති බව සඳහන්.
කෙසේ වෙතත් චීන රජයේ නීතියට අනුව එරට වැසියන්ට ද්විත්ව පුරවැසිභාවයන් තබා ගත නොහැකි වන අතර, එසේ වෙනත් රටක පුරවැසිභාවය ලබාගත හොත් චීන රජයේ පුරවැසිභාවය අහෝසි වනවා.
36 හැවිරිදි සහ 37 හැවිරිදි මෙම විදේශිකයින් දෙදෙනා ඊයේ (19) රාත්රි 09.35ට තායිලන්තයේ බැංකොක් නුවර සිට ශ්රී ලන්කන් ගුවන් සේවයේ යූ.එල්- 403 දරණ ගුවන් යානයෙන් ශ්රී ලංකාවට පැමිණ තිබුණා.
එලෙස පැමිණි ඔවුන් මුදල් ගෙවා පහසුකම් සළසා ගන්නා ‘සේද මාවත’ ඔස්සේ ආගමන කවුළුව වෙත පැමිණ ඇති අතර, එහිදී ඔවුන් ශ්රී ලංකාවට පැමිණීමේ නිශ්චිත හේතුව ආගමන විගමන දෙපාර්තමේන්තු නිලධාරීන්ට පැවසීමට අපොහොසත් වී තිබෙනවා.
චීන ජාතිකයින් මේ වනවිට ශ්රී ලංකාව තුළත්, අනෙකුත් විදේශීය රටවලත් මහා පරිමාණයෙන් පරිගණක අපරාධ සහ මුදල් අපරධයන්ට සම්බන්ධ වී සිටින බවට තොරතුරු අනාවරණය වෙමින් පැවැත්ම හේතුවෙන් ඒ පිළිබඳ සැළකිලිමත් වෙමින් මොවුන් දෙදෙනා ආපසු ඔවුන් පැමිණි ගමනාන්තය වෙත පිටුවහල් කිරීමයි කටයුතු කර තිබුණේ.
එලෙස මොවුන් දෙදෙනා පිටුවහල් කිරීමට පියවර ගැනීමත් සමඟ කටුනායක ආගමන විගමන දෙපාර්තමේන්තු නිලධාරීන් වෙත නිර්නාමික බලපෑම් සහිත දුරකථන ඇමතුම් කිහිපයක්ම ලැබී ඇති බවයි වාර්තා වුණේ.
