පෞද්ගලික ආරක්ෂාව සඳහා ආරක්ෂක අමාත්යාංශය විසින් නීත්යනුකූල ලෙස නිකුත් කර ඇති ගිනිඅවි භාරදෙන ලෙසට ආරක්ෂක ලේකම්වරයා සිදුකර ඇති නිවේදනය බලරහිත කරන රීට් ආඥාවක් නිකුත් කරන ලෙස ඉල්ලා ඇවෙන්රා හෝටල් සමූහ ව්යාපාරයේ අධිපති දිනේෂ් නවින්තක ද සිල්වා විසින් අභියාචනාධිකරණය හමුවේ පෙත්සමක් ගොනු කර තිබෙනවා.
ආරක්ෂක අමාත්යාංශ ලේකම්වරයා, ඇතුළු සිව්දෙනෙකු මෙහි වග උත්තරකරුවන් ලෙස නම්කර ඇති බව සඳහන්.
නීතිඥ සනත් විජයවර්ධන මඟින් මෙම පෙත්සම ගොනුකර ඇති අතර, පෙත්සම්කරු ප්රකට ව්යවසායකයකු සහ මීගමුව, වෙන්නප්පුව සහ හික්කඩුව ප්රදේශවල ඇති ඇවෙන්රා හෝටල් සමූහ ව්යාපාරයේ අධිපතිවරයා වශයෙන්ද කටයුතු කරන බව පෙත්සමෙහි සඳහන්.
විවිධ පිරිස් වෙතින් 2012/2013 කාලයේ දී එල්ලවූ තර්ජන හමුවේ ආරක්ෂක අමාත්යාංශයෙන් ගිනිඅවි ලබාගැනීමට පෙත්සම්කරු කටයුතු කර ඇති බව එහි සඳහන් වන්නේ.
පසුගිය අරගල සමයේදී පෙත්සම්කරුට අයත් මිගමුව හෝටලයට ඇතුළු වූ පිරිසක් විසින් ඊට බරපතළ හානියක් සිදු කළ අතර, ව්යාපාරික ස්ථානවලට ද විශාල අලාභ හානි සිදුවූ බව පෙත්සමමේ වැඩිදුරටත් දක්වා තිබෙනවා.
තත්ත්වය මෙසේ තිබිය දී පසුගිය ඔක්තෝබර් 07 වැනි දින ආරක්ෂක ලේකම්වරයා විසින් පුද්ගලයන් සතු සියලුම අවි ආයුධ යළි භාරදෙන ලෙසට නියෝග කරමින් චක්රලේඛයක් නිකුත් කර ඇති බව පෙත්සමෙහි සඳහන්.
ව්යාපාරිකයෙකු ලෙස තමන්ට එල්ල වන මැර තර්ජන හේතුවෙන් කෝටි ගණනක මුදල් ගෙවා ගිනිඅවි ලබාගත් අතර 2025 වසර සඳහා එම බලපත්ර නීත්යනුකූල ලෙස අලුත් කර ඇති බව ද පෙත්සම්කරු පෙන්වා දෙනවා.
ඊට අදාළ බදු මුදල් රජයට ගෙවා ඇති බව ද සඳහන් කරන පෙත්සම්කරු, මේ සම්බන්ධයෙන් පෙත්සම්කරු සහ ඔහුගේ පුත්රයන් දෙදෙනා අභියාචනා ඉදිරිපත් කළ ද යහපත් ප්රතිචාරයක් නොලැබුණු බව පෙත්සමෙහි සඳහන්.
මෙම ගිනිඅවි නැවත ලබාගැනීමේ තීරණය හේතුවෙන් තම ජීවිතයට තර්ජන එල්ල විය හැකි බව පෙත්සම්කරු විසින් පෙන්වාදී ඇති අතර, මෙම චක්රලේඛය ගිනිඅවි පනතට සහ නීතියට පටහැණි බව පෙත්සම්කරු කියා සිනවා.
එබැවින් අදාළ චක්රලේඛය බලරහිත කරන රීට් ආඥාවක් නිකුත් කරන ලෙස පෙත්සම්කරු සිය පෙත්සම මඟින් ඉල්ලා තිබෙනවා.