සංචාරක එංගලන්ත කණ්ඩායම සහ පාකිස්තාන කණ්ඩායම අතර පැවැත්වෙන තරග 03කින් සමන්විත ටෙස්ට් තරගාවලියේ පළමු තරගය අද (07) ආරම්භ වුණා.
ඒ පාකිස්තානයේ මුල්තාන් නුවර ක්‍රීඩාංගණයේ දීයි.
පළමු ටෙස්ට් තරගයේ කාසියේ වාසිය පාකිස්තාන කණ්ඩායම දිනා ගත්තා.
පාකිස්තාන කණ්ඩායමේ නායක ශාන් මසූඩ් (Shan Masood) තීරණය කළේ පළමුව පන්දුවට පහරදීමටයි.
ඒ අනුව පළමු ඉනිමේ පිතිකරණය අරඹමින් පාකිස්තාන කණ්ඩායමේ ආරම්භක පිතිකරුවන් ලෙස අබ්දුල්ලා ශාෆික් (Abdullah Shafique) සහ සයිම් අයුබ් (Saim Ayub) පිටියට පැමිණියා.
නමුත් ඔවුන්ට පිතිකරණයෙන් සාර්ථක වන්නට එංගලන්ත පන්දු යවන්නන් ඉඩ ලබා දුන්නේ නැහැ.
එංගලන්තයේ වේග පන්දු ක්‍රීඩක Gus Atkinson යොමු කළ පන්දුවකට Jamie Smith විසින් රැක ගන්නා ලද උඩ පන්දුවෙන් සයිම් අයුබ් ලකුණු 04කට යළි ක්‍රීඩාගාරයට හරවා යැවුණා.
කෙසේවෙතත් මේ වනවිට පාකිස්තාන කණ්ඩායම එක් කඩුල්ලක් බිඳ වැටී ලකුණු 111ක් ලබා සිටිනවා.
දෙවැනි කඩුල්ල වෙනුවෙන් පිටියෙහි රැඳී සිටින්නේ Abdullah Shafique සමගින් නායක ශාන් මසූඩ්.
අබ්දුල්ලා සහ ශාන් මසූඩ් අද දිනයේ දී සිය ටෙස්ට් අර්ධ ශතකයක් වැඩි කරගැනීමට සමත් වූ අතර ඔවුන් දෙදෙනා නොදැවී ලකුණු 53ක් සහ 60ක් අතැතිව පිටියෙහි රැඳී සිටිනවා.
පාකිස්තානය සහ එංගලන්තය අතර ටෙස්ට් තරග 88ක් පවත්වා ඇති අතර තරග 28ක් ජයගෙන ඇත්තේ එංගලන්තයයි.
තරග 21ක් පාකිස්තානය ජයගෙන තිබෙනවා.
තරග 39ක් ජය පරාජයෙන් තොරව අවසන් වී තිබීමත් විශේෂත්වයක්.
මෙවර පැවැත්වෙන තරග 03ම 2023-2025 ටෙස්ට් ලෝක ශූරතා තරගාවලියේ තරග කොටසක් ලෙසටයි පැවැත්වෙන්නේ.
එංගලන්ත කණ්ඩායමේ නායකත්වය ඔලී පොප් (Ollie Pop) විසින් හොබවනු ලබනවා.
