2024 වර්ෂයට අදාළ පහ ශ්‍රේණිය ශිෂ්‍යත්ව විභාගය අද (15) පැවැත් වෙනවා.
මෙවර විභාගය දිවයින පුරා පිහිටි විභාග මධ්‍යස්ථාන 2,849ක දී පැවැත්වෙන බවයි විභාග දෙපාර්තමේන්තුව සඳහන් කළේ.
පෙරවරු 9.30ට ආරම්භවන විභාගය සඳහා මෙවර අපේක්ෂකයින් 320,879 දෙනෙකු සුදුකම් ලබා සිටිනවා.
විභාගය අද (15) පෙරවරු 9.30 සිට දහවල් 12.15 දක්වා පැවැත්වෙන බවයි විභාග දෙපාර්තමේන්තුව වැඩිදුරටත් පැවසුවේ.
විභාග කොමසාරිස් ජෙනරාල් අමිත් ජයසුන්දර විභාග අපේක්ෂකයින්ට දැනුම් දෙන්නේ කල්වේලා ඇතිව විභාග මධ්‍යස්ථානයට පැමිණෙන ලෙසයි.
මේ අතර යම් ආපදාවක් හේතුවෙන් කිසියම් දරුවෙකුට විභාගයට පැමිණීමට නොහැකි වුවහොත් 117 හදිසි ඇමතුම් අංකයට දැනුම් දෙන ලෙස ආපදා කළමනාකරණ මධ්‍යස්ථානය මේ වනවිටත් උපදෙස් ලබා දී තිබෙනවා.
විභාගයට මුහුණ දෙන දරුවන්ට පහත උපදෙස් අනුගමනය කරන ලෙසයි විභාග කොමසාරිස්වරයා වැඩිදුරටත් දැනුම් දෙන්නේ.
ඒ අනුව, පිළිතුරු ලිවීමේදී ඒ සඳහා කළු හෝ නිල් පෑනක් භාවිත කළ හැකි අතර වෙනත් කිසිඳු වර්ණයක පෑන් භාවිත කළ නොහැකියි.
පිළිතුරු ලිවීම පැනසලෙන් ද කළ හැකි අතර, දරුවන්ට ඒ සඳහා පැන්සල් කිහිපයක් රැගෙන ආ හැකියි.
මකන, අඩි කෝදු ආදී උපකරණ ද විභාග මධ්‍යස්ථානයට රැගෙන පැමිණිය යුතුයි.
විභාග මධ්‍යස්ථානයට අවශ්‍යනම් වතුර බෝතලයක් රැගෙන යාමට අවසර හිමිවනවා.
ස්මාර්ට් අත්ඔරලෝසු සහ ෆයිල් කවර ආදිය විභාග මධ්‍යස්ථානය තුළට රැගෙන යාමට අවසර හිමි වන්නේ නැහැ.
මේ අතර විභාගය පැවැත්වෙන කාල සීමාව තුළ විභාග මධ්‍යස්ථාන අවට ශබ්ද විකාශන යන්ත්‍ර යොදාගනිමින් මැතිවරණ ප්‍රචාරක කටයුතු සිදුනොකරන ලෙස ද පොලිසිය දැනුම් දී තිබෙනවා.
