ඉන්දියාව තුළ කොවිඩ් වසංගතය උග්‍ර වීමත් සමඟ කුම්භමේලා ආගමික උත්සවය නතර කරයි

ඉන්දියාව තුළ කොවිඩ් වෛරස් ව්‍යාප්තිය උත්සන්නවීමත් සමඟ ඉන්දියාවේ උත්තරාකාන්ද් ප්‍රාන්තයේ හරිද්වාර් හි පැවැත්වෙන කුම්භමේලා ආගමික උත්සවය නතර කිරීමට එහි ප්‍රධාන පූජකතුමන් තීරණය කර තිබෙනවා.

ස්වාමි අවුදෙෂාන්ද් ගිරි එම තීරණයට එළඹුණේ අග්‍රාමාත්‍ය නරේන්ද්‍ර මෝදි සිදුකළ ඉල්ලීමකින් අනතුරුවයි.

කුම්භමේලා උත්සවය සංකේතාත්මකව පමණක් සිදුකිරීම යෝග්‍ය බවයි ඉන්දීය අග්‍රාමාත්‍යවරයා ප්‍රකාශ කළේ.

ඒ අනුව පසුගිය 01 වනදා ඇරඹුණු කුම්භමේලා උත්සවය එය ලබන 30 වනදා දක්වා මාසයක කාලයක් ක්‍රියාත්මක කිරීමට සැළසුම් කර තිබුණත් ඊයේ අවසන් කෙරුණා.

ගංඟා නදියේ හිස ගිල්වා පව් සෝදා හැරීමේ කුම්භමේලා චාරිත්‍රය අනාදිමත් කාලයක සිට සිදු කෙරෙන කටයුත්තක් වනවා.

ඊයේ ඉන්දියාවෙන් නව කොවිඩ් ආසාදිතයන් දෙලක්ෂ 34,692 ක් වාර්තා වූ අතර, එය, මෙතෙක් ඉන්දියාවෙන් වාර්තාවූ වැඩිම දෛනික ආසාදිත සංඛ්‍යාවයි.

ඒ අනුව එරට සමස්ත ආසාදිතයන් සංඛ්‍යාව එක්කෝටි හතළිස් පන් ලක්ෂය ඉක්මවනවා.

ඊයේ වාර්තාවූ තවත් මරණ 1,341 ක් සමඟින් එරට කොරෝනා මරණ සංඛ්‍යාවද 175,000 ඉක්මවූවා.

කොවිඩ් ව්‍යාප්තිය වැඩි වශයෙන් සිදුවන මහරාෂ්ඨ ප්‍රාන්තයේ පමණක් දෛනික ආසාදිත සංඛ්‍යාව 67,000 ඉක්මවීම විශේෂත්වයක්.

ලොව පුරා කොවිඩ් මරණ සංඛ්‍යාවද මේ වනවිට තිස් ලක්ෂය ඉක්මවා ඇති අතර, ආසාදිත සංඛ්‍යාව දහ හතර කෝටි දහතුන් ලක්ෂයකට ආසන්නයි.