මීරිගම-කුරුණෑගල මධ්යම අධිවේගයෙන් විපතට පත් වූ පවුල් 138ක තොරතුරු ඉල්ලීම්වලට අදාළ අභියාචනා 138ක් විභාගයට නොගෙන ප්රතික්ෂේප කිරීමෙන් තොරතුරු කොමිසම තොරතුරු පනත සහ ඒ යටතේ ගැසට් කර ඇති රීති උල්ලංඝනය කර ඇතැයි කියමින් එම පවුල් 138 වෙනුවෙන් සමාජය හා සාමයික කේන්ද්රයේ පර්යේෂණ කණ්ඩායම් සාමාජික තරිඳු ජයවර්ධන අභියාචනාධිකරණයට පෙත්සම් දෙකක් ඉදිරිපත් කර තිබෙනවා.
තොරතුරු කොමිසමේ තීන්දුව ඉවත දමමින් අදාළ තොරතුරු ලබාදෙන ලෙසට මාර්ග සංවර්ධන අධිකාරියට නියෝග කරන ලෙස එම අභියාචනා පෙත්සම් මගින් ඉල්ලා ඇති බවයි වාර්තා වන්නේ.
සමාජය හා සාමයික කේන්ද්රයේ පර්යේෂක තරිඳු ජයවර්ධන වෙනුවෙන් මානව හිමිකම් නීති චේම්බරය විසින් මෙම පෙත්සම් ගොනු කර ඇති අතර එක් පෙත්සමක් වෙනුවෙන් නීතිඥ ඩිලාන් නාලක සමග නීතිඥ තිෂ්ය වේරගොඩ මහතාත් තවත් පෙත්සමක් වෙනුවෙන් නීතිඥ මනුෂිකා කුරේ මහත්මිය සමග නීතිඥ සුරෙන් ඩී පෙරේරා මහතාත් පෙනී සිටීමට නියමිතයි.
මෙම අභියාචනා ඉදිරිපත් කර ඇත්තේ තොරතුරු දැන ගැනීමේ අයිතිවාසිකම පිළිබඳ කොමිසමේ සභාපති උපාලි අබේරත්න ප්රමුඛ කොමසාරිස්වරුන් විසින් දෙන ලද තීන්දුවකට එරෙහිව බවයි අප අධිකරණ වාර්තාකාරිණිය පැවසුවේ.
තොරතුරු දැන ගැනීමේ අයිතිවාසිකම පිළිබඳ කොමිසම අලුතෙන් රීති සකස් කරන්නේ නම් එය ක්රියාත්මක විය යුත්තේ ඇමතිවරයා විසින් ගැසට් පත්රයේ පළකිරීමෙන් පසුව බවත්, එසේ තිබියදී මෙම අභියාචානවලට අදාළ රීති වෙනස් කරමින් ප්රතිචාර දැක්විය යුතු පෝරම සංශෝධනය කරමින් කොමිසම කටයුතු කර ඇති බවත්, අභියාචනා රීති සංග්රහයේ 18, 19 ඇතුළු රීති ගණනාවක් මෙන්ම පනතේ ප්රතිපාදනද තොරතුරු කොමිසම උල්ලංඝනය කර ඇති බවත් එම පෙත්සම්වල සඳහන් වනවා.
සාමාන්ය ක්රමවේදය යටතේ අභියාචනයක් යොමු කර මාසයක් ඇතුළත තීන්දුව ලබා දිය යුතු තොරතුරු කොමිසම හදිසි ප්රතිපාදන යටතේ ඉදිරිපත් කළ මෙම තොරතුරු ඉල්ලීම්වලට අදාළ අභියාචනා විභාගයට නොගෙන ප්රතික්ෂේප කරමින් තීන්දුව ලබා දී ඇත්තේ කොමිසමට අභියාචනා කර මාස 09කට පසු බව ද එහි සඳහන් කර ඇති බවයි වාර්තා වන්නේ.
එසේම කොමිසම අභියාචනාවලට අදාළ ව ලිඛිත දේශන ලබාදෙන ලෙස ඉල්ලමින් නිකුත් කළ සිතාසිය ගැසට් පත්රයේ පළ කළ රීති උල්ලංඝනය කරමින් එම රීතිවල සඳහන් කරුණු ඉවත් කර සංශෝධනයට ලක් කරමින් සකස් කළ සිතාසියක් බව ද, කොමිසම අභියාචනා විභාග කිරීමට මුලින් තීන්දු කර පසුව රීති උල්ලංඝනය කරමින් අභියාචනා ප්රතික්ෂේප කිරීමට තීන්දු කර ඇතැයි ද වැඩිදුරටත් එම පෙත්සම්වල සඳහන් කර තිබෙනවා.
