ත්‍රීරෝද රථයක බිළිඳු මළ සිරුරක්

ගාල් කර තිබූ ත්‍රිරෝද රථයක් පිටුපස පොහොර උරයක දමා තිබී බිළිඳු මළ සිරුරක් හමුවූ බව ආගරපතන පොලිසිය පවසනවා.

ආගරපතන පොලිස් වසමට අයත් හෙන්ෆොල්ඩ් වතුයායේ ඩි.එල් කොටසේ වතු නිවාස පේලියක් අසල ගාල් කර තිබූ ත්‍රිරෝද රථයක් තුළ තිබී එම මළ සිරුර හමුවී තිබෙනවා.

පැවති දැඩි දුර්ගන්දයට හේතුවෙන් ත්‍රීරෝද රථ රියදුරාගේ මව විසින් සිදු කරන ලද පරීක්ෂාකිරීමේ දී මෙම මළ සිරුර හමුවී තිබුණා.

ත්‍රීරෝද රථයේ රියදුරා එම වතුයායේම පදිංචිකරුවෙකු බවත්, ඔහු ත්‍රිරෝද රථයෙන් කුලී රථ ගමනක් ගොස් අද (10) දින උදෑසන නිවසට පැමිණ ත්‍රිරෝද රථය ගාල් කර ඇති බව දැනට සිදුකරන ලද මූලික විමර්ෂණ වලදී අනාවරණය වී තිබෙනවා.

බිළිඳු මළ සිරුර සම්බන්ධයෙන් නුවරඑළිය මහෙස්ත්‍රාත් අධිකරණය වෙත කරුණු වාර්තාකර මහෙස්ත්‍රාත්වරයාගේ නියෝගය පරිදි ඉදිරි විමර්ෂණ කටයුතු සිදු කරන බව ආගරපතන පොලිසිය කියා සිටියා.