ජනාධිපති රනිල් වික්රමසිංහ මහතාගේ ‘පුළුවන් ශ්රී ලංකා’ ප්රතිපත්ති ප්රකාශය අනිද්දා (29) එළිදැක්වීමට නියමිතව තිබෙනවා.
මේ සම්බන්ධයෙන් විශේෂ නිවේදනයක් ‘පුළුවන් ශ්රී ලංකා’ මාධ්ය අංශයෙන් නිකුත් කෙරුණු අතර; කොළඹ පැවති ‟පුළුවන් ශ්රී ලංකා” මාධ්ය හමුවට එක්වෙමින් රාජ්ය අමාත්ය සුරේන් රාඝවන් මෙම කරුණු ප්රකාශ කළා.
21 වැනි සියවසේ විශ්වවිද්යාල සහ උසස් අධ්යාපනය ජයගත හැකි අධ්යාපන ක්රමවේදයක් හෝ දර්ශනයක් ජාතික ජන බලවේග ප්රතිපත්ති ප්රකාශනය තුළ නොමැති බව උසස් අධ්යාපන රාජ්ය අමාත්ය සුරේන් රාඝවන් මහතා සඳහන් කර ඇති බවයි එම මාධ්ය නිවේදනයේ දැක්වෙන්නේ.
එහිදී එළඹෙන මැතිවරණය පිළිබඳ ව අදහස් දක්වමින් අමාත්යවරයා කියා සිටියේ, එය රටේ දිශානතිය ආර්ථික සාමාජීය සහ අධ්යාත්මික වශයෙන් වෙනස් කරන සහ මෙරට ජනතාවගේ පුරවැසි බලය තරවුරු කරන ක්රියාවලියක් බවයි.
රාජ්ය විශ්වවිද්යාල පද්ධතියේ ඇති ගැටළු පිළිබඳ ව අදහස් දක්වමින් අධ්යාපන පද්ධතිය සංවර්ධනය විය යුතු ආකාරය පිළිබඳ ව ද රාජ්ය අමාත්යවරයා අදහස් දැක්වූවා.
තවදුරටත් අදහස් දැක්වූ රාජ්ය ආමාත්යවරයා සඳහන් කළේ; මෙරට අධ්යාපන ක්රමය ගොඩ නැගීමට සහ සංවර්ධනයට රනිල් වික්රමසිංහ ප්රබල දායකත්වයක් ලබා දුන් බවයි.
එමෙන්ම එළඹෙන අගෝස්තු 29 වැනිදා ජනාධිපතිවරයාගේ ප්රතිපත්ති ප්රකාශය නිකුත් වන බවත් එම ප්රකාශය නිකුත් වනවාත් සමගම තමන් මාධ්ය සමග ප්රසිද්ධ සාකච්ඡාවකට එක්වීමට කැමැත්තෙන් සිටින බවත් මෙම මාධ්ය හමුවට එක් වූ අමාත්යවරයා වැඩිදුරටත් කියා සිටියා.
