2024 ආසියානු කුසලාන කාන්තා 20-20 ක්‍රිකට් තරගාවලියේ අවසන් මහා තරගයට සුදුකම් ලබන්නට ශ්‍රී ලංකා කාන්තා කණ්ඩායමට ඊයේ (26) රාත්‍රියේ හැකියාව ලැබුණා.
ඒ, අනුව ශ්‍රී ලංකා ක්‍රීඩිකාවන් ආසියානු කුසලානයේ ජයග්‍රහණය සොයා හෙට (28) ප්‍රබල ඉන්දීය කාන්තා කණ්ඩායම සමඟ අවසන් මහා තරගයට පිවිසෙනවා.
මෙවර තරගාවලියේ පාකිස්ථාන කාන්තා කණ්ඩායම සමඟ පැවති දෙවන අවසන් පූර්ව තරගයේ දී ශ්‍රී ලංකා කණ්ඩායම ජයගත්තේ කඩුලු තුනකින්.
මෙම තරගය ජයග්‍රහණය කිරීම සඳහා පිත්තෙන් වැඩි දායකත්වයක් සැපයූ ශ්‍රී ලංකා නායිකා චමරි අතපත්තු ඊයේ සිය 11 වන ජාත්‍යන්තර විස්සයි විස්ස අර්ධ ශතකය රැස් කිරීමට සමත් වුණා.
මේ අතර විස්සයි විස්ස පිටියේ වාර්තාවක් පිහිටුවන්නට චමරිට මෙම වටිනා ඉනිමත් සමඟ හැකියාව ලැබුණා.
ඒ, ජාත්‍යන්තර විස්සයි විස්ස පිටියේ දී කණ්ඩායමක නායිකාවක් ලෙස රැස්කරගෙන සිටින වැඩිම ලකුණු සංඛ්‍යාවේ හිමිකාරිත්වය තමන් සතුකර ගනිමින්.
චමරි මේ වනවිට නායිකාවක් ලෙස ජගත් විස්සයි විස්ස පිටියේ ඉනිම් 92ක දී ලකුණු 2623ක් රැස්කරගෙන නායිකාවන් අතර පෙරමුණ ගැනීමට සමත්ව සිටිනවා.
මීට පෙර එම වාර්තාවට හිමිකම් කීවේ ඕස්ට්‍රේලියානු කාන්තා 20-20 නායිකාව ලෙස කටයුතු කළ මෙග් ලැනින් වන අතර ඇය විස්සයි විස්ස තරග 89ක දී නායිකාවක් ලෙස ලකුණු 2619ක් රැස්කරගෙන තිබෙනවා.
