ක්‍රිස් සිල්වර්වුඩ් පුහුණුකාරීත්වයට තිත තබයි (නිවේදනය)

ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකාරීත්වය දැරූ ක්‍රිස් සිල්වර්වුඩ් සිය ධුරයෙන් ඉල්ලා අස් වී තිබෙනවා.

තමන් ධුරයෙන් ඉල්ලා අස්වෙන බවට දන්වමින් ඊට අදාළ ලිපිය ශ්‍රී ලංකා ක්‍රිකට් ආයතනයට යොමු කර ඇති බවයි වාර්තා වන්නේ.

2022 අප්‍රේල් මාසයේ දී සිල්වර්වුඩ් ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු වශයෙන් තේරී පත් වුණා.

එංගලන්ත ක්‍රිකට් කණ්ඩායමේ හිටපු ක්‍රීඩකයෙකු වන සිල්වර්වුඩ් ශ්‍රී ලංකා ක්‍රිකට් කණ්ඩායම පසුගිය වසර දෙක තුළ පසුකළ එක්දින, පන්දුවාර 20 සහ ටෙස්ට් යන තුන් ආකාරයේ ම තරග රටාවලින් විශිෂ්ට ලෙස ජයග්‍රහණ ලබා ගැනීමට සමත් වීම කාගෙත් කතාබහක් මතු කළ කාරණයක් වුණා.

කෙසේවෙතත් පසුගිය දිනක දී ශ්‍රී ලංකා කණ්ඩායමට මෙවර පන්දුවාර 20 ක්‍රිකට් ලෝක කුසලානයේ මූලික වටයේ තරගයෙන් ම් ඉවත් වන්නට සිදු වීමත් ඒ වනවිට සිල්වර්වුඩ්ගේ කොන්ත්‍රාත් කාලය ද අවසන් වෙමින් පැවතීම ද ක්‍රිස් සිල්වර්වුඩ් පිළිබඳ යළි යළිත් ප්‍රේක්ෂකයින් අතර මෙන් ම විචාරකයින් අතර ද නිරන්තරයෙන් රැව් පිළිරැව් දෙන නාමයක් බවට පත් වුණා.

මෙම ඉල්ලා අස්වීම සම්බන්ධයෙන් සිල්වර්වුඩ් සඳහන් කර ඇත්තේ සිය පෞද්ගලික කාරණයක් හේතුවෙන් තමන් ධුරයෙන් ඉල්ලා අස්වන බවයි.

සිල්වර්වුඩ් සිය ඉල්ලා අස්වීමේ ලිපියේ වැඩිදුරටත් සඳහන් කර ඇත්තේ; තමන්ගේ ධුර කාලය පුරාවට ම ශ්‍රී ලංකා ක්‍රිකට් ආයතනය, පුහුණුකරුවන්, කළමනාකාරීත්වය සහ ක්‍රීඩකයින් විසින් ලබාදෙනු ලැබූ සහයෝගය ඉතාමත් විශිෂ්ට බවත්; ඊට සිය ස්තුතිය පුද කර සිටින බවයි.

ක්‍රිස් සිල්වර්වුඩ්ගේ ප්‍රධාන පුහුණුකාරීත්වය යටතේ ශ්‍රී ලංකා ක්‍රිකට් කණ්ඩායම 2022 වර්ෂයේ ආසියානු කුසලානයේ (පන්දුවාර 20) ශූරතාව, ආසියානු කුසලානයේ (එක්දින) අනුශූරතාව, සිය මව්බිමේ දී සංචාරක ඔස්ට්‍රේලියාවට එරෙහිව එක්දින තරගාවලි ජයක් ලැබීම සහ බංග්ලාදේශයට එරෙහිව ලැබූ ටෙස්ට් තරගාවලි ජය ද මේ අතර කැපී පෙනෙනවා.

මේ අතර ශ්‍රී ලංකා ක්‍රිකට් පුහුණු උපදේශක තනතුරින් මහේල ජයවර්ධන ද ඊයේ (26) ඉල්ලා අස්වීමට කටයුතු කර තිබුණා.