සීෂෙල්ස් රාජ්‍යයේ පැවැත්වූ ආරාධිත බොක්සි තරගාවලියේ දී රන් පදක්කම් 02ක්, රිදී පදක්කම් 02ක් සහ ලෝකඩ පදක්කම් 02ක් දිනාගත් ශ්‍රී ලාංකික ක්‍රීඩකයින් පිරිසක් මෙරටට පැමිණියා.
අද (26) අලුයම 03.50 ට සීෂෙල්ස් සිට එම රටට අයත් ගුවන් සේවයේ එච්.එම්.- 262 දරන ගුවන් යානයෙන් කටුනායක ගුවන් තොටුපොළ වෙත ඔවුන් පැමිණි බවයි අප ප්‍රාදේශීය වාර්තාකරු පැවසුවේ.
මෙම තරගාවලිය පැවැත්වූයේ සීෂෙල්ස් රාජ්‍යයේ ජාතික නිදහස් දින උත්සවයට සමගාමීව‍යි.
තරගාවලිය සඳහා ශ්‍රී ලංකාවට අමතරව සීෂෙල්ස්, මුරිසිය, රී – යුනියන් සහ කෙන්යාව යන රටවල් නියෝජනය කරමින් බොක්සිං ක්‍රීඩකයින් සහභාගී වී සිටියා.
ශ්‍රී ලංකා බොක්සිං කණ්ඩායමට පාසැල් ක්‍රීඩකයින් දෙදෙනෙකු සහ ශ්‍රී ලංකා පොලිසිය සහ ත්‍රිවිධ හමුදාව නියෝජනය කරමින් ක්‍රීඩකයින් සිව්දෙනෙකු සහභාගී වූ අතර ඔවුන් පිළිගැනීමට එම පාසැල්වල සිසුන් ගුරු භවතුන්, ශ්‍රී ලංකා පොලිසියේ සහ ත්‍රිවිධ හමුදා නිලධාරීන් මෙන් ම ශ්‍රී ලංකා බොක්සිං සම්මේලනයේ නිලධාරීන් පිරිසක් ද ගුවන් තොටුපොළ වෙත පැමිණි බවත් වාර්තා වනවා.
