එක ම සටන් පාඨයක දිගින් දිගට ම එල්බගෙන, අසනීප නිවාඩු ගනිමින් වෘත්තීය ක්‍රියාමාර්ගවල නිරත ගුරුවරුන් ගැන නොසිතා, වර්තමාන සිසු පරපුර නව තාක්ෂණය, අන්තර්ජාලය සහ වෙනත් දැනුම් මූලාශ්‍රවලින් සිය අධ්‍යාපන අවශ්‍යතා පූර්ණ කරගන්නා බව අධ්‍යාපන අමාත්‍ය සුසිල් ප්‍රේම්ජයන්ත් පවසනවා.
අමාත්‍යවරයා මේ බව පැවසුවේ පසුගියදා නෙස්ලේ ලංකා සමාගමේ අනුග්‍රහයෙන් කොළඹ ගෝතමී බාලිකා විද්‍යාලයේ දී පැවැති සමස්ත ලංකා පාසල් අපද්‍රව්‍ය කළමනාකරණ පාසල් පෝස්ටර් චිත්‍ර තරගයේ ත්‍යාග ප්‍රදානෝත්සවයට එක්වෙමින්.
ශීඝ්‍රයෙන් වෙනස් වෙමින් යන දැනුම් සමාජයේ නව ප්‍රවණතා පිළිබඳ යථා අවබෝධයකින් තොර ව සමාජයේ ඉදිරියට යා නොහැකි බවත් මේ බව ප්‍රධාන වශයෙන් ම ගුරුවරුන් හා වැඩිහිටියන් අවබෝධ කරගත යුතු ව ඇති බවත් අමාත්‍යවරයා අවධාරණය කළා.
සියලු පාසල් ඩිජිටල්කරණය කර එක ම ජාලයකට ගතහොත් සමස්ත විෂය පාඩම් එක තැනක සිට දරුවන්ට ඉගැන්විය හැකි වනු ඇති බවයි අමාත්‍යවරයා වැඩිදුරටත් පැවසුවේ.
