පානදුර දුම්රිය ස්ථානය ආසන්නයේ අද (13) පෙරවරුවේ මන්දගාමී දුම්රියක් පීලි පැනීමකට ලක් ව දුම්රිය ධාවනයට සිදු වූ බාධාව මේ වනවිට යම් තාක් දුරකට විසඳා ඇති බවට තොරතුරු වාර්තා වනවා.
අද උදෑසන පානදුර සිට මරදාන බලා ධාවනය වෙමින් තිබූ මන්දගාමී දුම්රියක් මෙලෙස අනතුරට ලක් වුණා.
මේ හේතුවෙන් පැය තුනකට අධික කාලයක් මුහුදුබඩ මාර්ගයේ දුම්රිය ගමනාගමනය තාවකාලික ව නතර කිරීමටයි දුම් රිය ස්ථානය භාර නිලධාරීන් කටයුතු කළේ.
මේ හේතුවෙන් රජරට රැජිණ දුම්රියේ ගමනාගමනය ද කොළඹ කොටුව දක්වා සීමා කෙරුණා.
දුම්රිය පීලි පැනීමෙන් අසල තිබූ දුම්රිය සංඥා කණුවකට ද දැඩි අලාභ හානි සිදු වූ අතර, එය පීලි පැනීමට ලක් වන අවස්ථාවේ දී දුම් රිය පාපුරුවේ සිටි පුද්ගලයෙකු බිමට ඇද වැටෙන ආකාරය ද අසල සවිකර තිබූ ආරක්ෂිත කැමරාවක සටහන් වී තිබූ අයුරුයි වාර්තා වන්නේ.
පානදුර දුම්රිය ස්ථානය ආසන්නයේ දුම්රිය අනතුරින් අවහිර වී තිබූ දුම්රිය මාර්ග දෙකෙන් එක් දුම්රිය මාර්ගයක් අද දහවල් 2.35 වන විට විවෘත කිරීමට දුම්රිය කාර්මික ශිල්පීන් සමත් වුණා.
කොළඹ ජල ධාවක බලාගාර ශිල්පීන් ඇතුළු 50කට ආසන්න ප්රමාණයක් පැය තුනක පමණ කාලයක් දැඩි වෙහෙසක් දරා එම දුම්රිය මාර්ගය යථා තත්ත්වයට පත් කළ බවයි අප ප්රාදේශීය වාර්තාකරු පැවසුවේ.
මේ අතර උඩරට දුම්රිය මාර්ගයේ ද පීලි පැනීමක් සිදු ව තිබෙනවා.
බදුල්ල දුම්රිය ස්ථානයේ සිට කොළඹ කොටුව බලා ධාවනය වන ශීඝ්රගාමී දුම්රිය අද දින පස්වරු 03.25 ට පමණ තලවකැලේ හා වටගොඩ දුම්රිය ස්ථාන අතරදියි පීලි පැනීමට ලක් ව ඇත්තේ.
එම අනතුරින් දුම්රියේ නැරඹුම් මැරිදියේ එක් රෝද කට්ටලයක රෝදයක් පමණක් පීලි පැනීමකට ලක් ව තිබෙනවා.
මේ හේතුවෙන් උඩරට මාර්ගයේ ගමනාගමනයට ද බාධා එල්ල වී ඇති බවයි වාර්තා වන්නේ.
