වෙන්නප්පුව – වෛක්කාල මුහුදු තීරයේ ඇති තරු පන්ති හෝටල්වලට ගමන් කළ හැකි එකම මාර්ගය කාලයක සිට ගිං ඔයට සේදී යාමට පටන් ගෙන තිබෙනවා.
අප ප්රාදේශීය වාර්තාකරු පැවසුවේ එම සිදුවීම සම්බන්ධයෙන් වගකිවයුත්තන් කිසිවෙකු ඒ සම්බන්ධයෙන් අවධානයක් යොමු කර නොමැති බවයි.
වෛක්කාල මුහුදු තීරයේ ඇති හෝටල් වෙත ගමන් කළ හැකි එකම මාර්ගය “බෝලවත්ත – කම්මල” මාර්ගය වනවා.
මෙම මාර්ගය අවසානයේ මුහුදු වෙරළ සමීපයේ තරු පන්ති හෝටල් කිහිපයක් ම පිහිටා තිබීම සංචාරක කර්මාන්තය වශයෙන් මෙහි වැදගත්කමක් උසුලනවා.
එම මාර්ගයේ කොටසක් දිව යන්නේ “ගිංඔයට” මායිම් ව වන අතර ගිංඔයේ ඉවුර කාලයක සිට සේදී යන්නට පටන් ගෙන ඇති බවයි වාර්තා වන්නේ.
ඒ පිළිබඳ ව වගකිව යුතු අංශ අවස්ථා කිහිපයක දී ම දැනුවත් කර ඇති නමුත් පලක් නොවූ බව හෝටල් සේවකයින් මෙන් ම
ප්රදේශවාසීන් ද පවසනවා.
මාර්ගය ගිංඔයට සේදී යාම පාලනය කිරීම සඳහා හෝටල් සේවකයින් සහ ප්රදේශවාසීන් විසින් තාවකාලික විසඳුම් මේ වනවිට ගෙන ඇති නමුත් ඒ සියල්ල ව්යර්ථ වෙමින් මාර්ගයේ විශාල කොටසක් පුපුරා ගොස් ඒවා ගිං ඔයට කඩා වැටීමේ අවදානමක් නිර්මාණය වී ඇති බවයි වාර්තා වන්නේ.
මෙම මාර්ගයේ ඇති හෝටල්වලට දෙස් විදෙස් සංචාරකයින් රැගත් සැහැල්ලු වාහන මෙන් ම විශාල ප්රමාණයේ සුඛෝපභෝගී බස් රථ ද පැමිණෙන බව හෝටල් සේවකයින් සඳහන් කරන අතර, කුමන අවස්ථාවක දී හෝ විශාල අනතුරක් සිදුවීමේ ඉඩකඩක් ඇති බවට ද ඔවුන් පවසනවා.
මෙවන් තත්ත්වයක් මත සංචාරක කර්මාන්තයට පිටුවහලක් සපයන මෙම මාර්ගය පිළිසකර කිරීමට වගකිව යුතු බලධාරීන්ගේ අවධානය යොමු කරන ලෙසටයි ප්රදේශවාසීන් ඉල්ලා සිටින්නේ.
