විස්සයි විස්ස ලෝක කුසලාන තරගාවලියේ ඉන්දු – පාකිස්ථාන තරගය අද (09) රාත්‍රියේ පැවැත්වීමට නියමිතයි
නිව්යෝර්ක් හි නසාවු ක්‍රිකට් ක්‍රීඩාංගණයේ දී පැවැත්වෙන මෙම තරගයට වර්ෂාවෙන් බාධා එල්ල වනු ඇති බවයි නිව්යෝර්ක් කාලගුණ අංශ අනාවැකි පළකර ඇත්තේ.
ඒ, අනුව ක්‍රීඩාංගණය පිහිටි ප්‍රදේශයට ගිගුරුම් සහිත වැසි ඇති විය හැකි බවයි කාලගුණ අංශ වැඩිදුරටත් පවසන්නේ.
පවතින තත්ත්වයත් සමඟ තරගයේ පළමු ඉනිම වර්ෂාවෙන් විනාශ වන අතර, ඩක්වත් ලුවිස් න්‍යාය මධ්‍යයේ කාසියේ වාසිය තරගයේ තීරණාත්මක සාධකයක් බවට පත් වනු ඇති බවයි විචාරකයින් මත පළ කරන්නේ.
ඉන්දු – පාකිස්ථාන තරගයට වර්ෂාවෙන් බාධා එල්ල වී එය පැවැත්වීමට අවස්ථාව නොලැබුණහොත් තරගය වෙනුවෙන් වෙනත් රක්ෂිත දිනයක් ද වෙන්කර නැහැ.
ඒ, අනුව තරගය වර්ෂාවට සේදී ගියහොත් ඉන්දියාව සහ පාකිස්ථානයට එක් ප්‍රසාද ලකුණු බැගින් බෙදී යනු ඇති.
මේ අතර 35,000ක පමණ ප්‍රේක්ෂණ ධාරිතාවයකින් යුත් නසාවු ක්‍රිකට් ක්‍රීඩාංගණයේ සිට තරග නැරඹීම වෙනුවෙන් නිකුත් කර ඇති ප්‍රවේශ පත්‍ර සියල්ල අලෙවි වී අවසන් බවයි නිව්යෝර්ක් වලින් වාර්තා වුණේ.
මෙම තරගය වෙනුවෙන් මෙරට මුදලින් රුපියල් ලක්ෂ 06කට ආසන්න වටිනාකමකින් යුත් ප්‍රවේශපත්‍ර ද නිකුත්කර තිබීම විශේෂත්වයක්.
