පාර්ලිමේන්තු මන්ත්‍රී මහින්දානන්ද අලුත්ගමගේ ගේ ප්‍රහාරයකට ලක්ව පාදයක බරපතළ තුවාල ලබා රෝහල් ගත කළ බව කියන මහනුවර දිස්ත්‍රික් පාර්ලිමේන්තු මන්ත්‍රී ගුණතිලක රාජපක්ෂට පැය 04ක පමණ ශල්‍යකර්මයක් සිදුකළ බව ඔහුගේ පුත් නිලුපුල් රාජපක්ෂ පවසනවා.
ශල්‍යකර්මයකට භාජනය කිරීමෙන් පසු මන්ත්‍රීවරයා මේ වනවිට කොළඹ යුද හමුදා රෝහලේ දැඩිසත්කාර ඒකකයේ ප්‍රතිකාර ලබන බවයි වාර්තා වන්නේ.
එලෙස දැඩිසත්කාර ඒකකයේ ප්‍රතිකාර ලබන මන්ත්‍රීවරයා පැවසුවේ තමන් සහ අලුත්ගමගේ මන්ත්‍රීවරයා උණුසුම් කතාබහක නිරත වූ අවස්ථාවේ දී මහින්දානන්ද අලුත්ගමගේ මන්ත්‍රීවරයා එක්වරම තමාට අතින් පයින් පහර දුන් බවයි.
මහින්දානන්ද අලුත්ගමගේ මන්ත්‍රීවරයා මෙම සිද්ධිය සම්බන්ධයෙන් අදහස් දක්වමින් සඳහන් කළේ ගුණතිලක රාජපක්ෂ මන්ත්‍රීවරයා සමඟ උණුසුම් වචන හුවමාරුවක පැටලුණු අවස්ථාවේ තමා ඔහුගේ කමිස කොළරයෙන් අල්ලාගත් බවත්, ඒ අසල සිටි තවත් මන්ත්‍රීවරුන් කිහිපදෙනෙක් රාජපක්ෂ මන්ත්‍රීවරයා පසුපසට ගැනීමට උත්සාහ කිරීමේ දී ඔහු ඇද වැටී තුවාල ලැබූ බවයි.
මේ සම්බන්ධයෙන් නිවැරදි දර්ශන ජනාධිපති ලේකම් කාර්යාලයේ ආරක්ෂිත කැමරා පද්ධතිය පරීක්ෂා කිරීමෙන් ලබාගත හැකි බව ද ඔහු පැවසුවා.
ඊයේ (03) රාත්‍රියේ ජනාධිපතිවරයාගේ ප්‍රධානත්වයෙන් ජනාධිපති ලේකම් කාර්යාලයේ පැවති ආණ්ඩු පක්ෂ මන්ත්‍රී කණ්ඩායමේ රැස්වීමකින් පසුව මන්ත්‍රීවරුන් දෙදෙනා අතර මෙම උණුසුම් තත්ත්වය ඇතිව තිබුණා.
