පළමු වරට පැය 24 ක් තුළ බ්‍රසීලයෙන් කොවිඩ් ආශ්‍රිත මරණ 4,000 කට වඩා වාර්තා වී ඇති බව විදෙස් මාධ්‍ය පවසනවා. රෝහල් තදබදයෙන් පිරී ඇති අතර ඇතැම් නගරවල ප්‍රතිකාර සඳහා ජනතාව බලා සිටින අතරතුර මිනිසුන් මිය යන බවද වාර්තා වනවා
එරට සෞඛ්‍ය පද්ධතිය බොහෝ ප්‍රදේශවල බිඳවැටීමේ අනතුරුදායක තත්ත්වයක පවතින බවද සඳහන්. බ්‍රසීලයේ මුළු මරණ සංඛ්‍යාව මේ වන විට 337,000 ක් පමණ වන අතර එය එක්සත් ජනපදයට පමණක් දෙවැනි වන බවයි වාර්තා වන්නේ
පවතින තත්ත්වය මැඩපැවැත්වීම සඳහා වන ඕනෑම අගුලු දැමීමේ පියවරකට ජනාධිපති බොල්සනාරෝ (Jair Bolsonaro) දිගින් දිගටම විරුද්ධ වන බව එරට මාධ්‍ය වාර්තා කර තිබෙනවා
ආර්ථිකයට සිදුවන හානිය වෛරසයේ බලපෑමට වඩා දරුණු වනු ඇතැයි ඔහු ප්‍රකාශ කර තිබෙන අතර, පළාත් පාලන ආයතන විසින් අධිකරණය තුළ පනවා ඇති සමහර සීමාවන් ආපසු හැරවීමට ජනාධිපතිවරයා උත්සාහ කර තිබෙනවා
ඊයේ (06) නිවසින් පිටත රැඳී සිටි ආධාරකරුවන් අමතමින් ජනාධිපතිවරයා, නිරෝධායන ක්‍රියාමාර්ග විවේචනය කර තිබෙන අතර ,පසුගිය පැය 24 තුළ වාර්තා වූ මරණ 4,195 ගැන ඔහු කිසිවක් ප්‍රකාශ කර නැති බවද වාර්තා වනවා
මේ දක්වා බ්‍රසීලයේ කොරෝනා වෛරස් රෝගීන් මිලියන 13 කට වඩා වාර්තා වී ඇති බව එරට සෞඛ්‍ය අමාත්‍යාංශය පවසනවා
