පිරිසක් විසින් අඹුසැමි යුවළක් පැහැරගෙන ගොස් එහි පිරිමි පුද්ගලයාට තියුණු ආයුධවලින් පහර දී ඝාතනය කර ඇති බව වඩුක්කෝට්ටේ පොලිසිය පවසනවා.
ඊයේ (11) රාත්‍රියේ වඩුක්කෝට්ටේ, පොන්නාලේ හන්දිය ප්‍රදේශයේ දී මෙම පැහැරගැනීම සිදුකර ඇති බවයි වාර්තා වුණේ.
ඝාතනයට ලක් වූ පුද්ගලයා 24 හැවිරිදි වියේ පසු වූ වඩුක්කෝට්ටේ ප්‍රදේශයේ පදිංචිකරුවෙක්.
මෙලෙස ඝාතනය ලක් වූ පුද්ගලයා ඊයේ සිය බිරිඳ සමඟ යතුරුපැදියකින් ගමන් කරමින් සිටිය දී ඔහු සමඟ අමනාපව සිටින පුද්ගලයෙක් මෝටර් රථයකින් පැමිණ තිබෙනවා.
ඒ, බව දැක ඇති අදාළ පුද්ගලයා යතුරුපැදිය ආපසු හරවාගෙන පොන්නාලේ නාවික හමුදා මුරපොළ අසළට ධාවනය කර ඇති බව සඳහන්.
කෙසේ වෙතත් මෝටර් රථයේ සිටි පිරිස යතුරුපැදිය පසුපස පන්නාගෙන විත් යතුරුපැදිය සමඟ අදාළ යුවළ පැහැරගෙන ඇති බවයි පොලිසිය පැවසුවේ.
පසුව කාන්තාව සිත්තන්කේනි හන්දිය ප්‍රදේශයේ දමාගොස් පිරිමි පුද්ගලයා රැගෙන ගොස් තිබෙනවා.
එහිදී අදාළ පුද්ගලයාට තියුණු ආයුධවලින් පහර දී බරපතළ සිදුකර කොට්ටකාඩු රෝහල අසළට මෝටර් රථයකින් ගෙනවිත් දමා පළාගොස් ඇති බවයි අනාවරණය වී ඇත්තේ.
පසුව එම පුද්ගලයා රෝහල් ගතකර ඇති අතර, ඔහු වැඩිදුර ප්‍රතිකාර සඳහා යාපනය රෝහලට ඇතුළත් කිරීමේ දී ජීවිතක්ෂයට පත්ව ඇති බවයි පොලිසිය පැවසුවේ.
මෙම ඝාතනය සම්බන්ධ සැකරුවන් හඳුනාගෙන ඇති අතර, ඔවුන් අත්අඩංගුවට ගැනීමට විමර්ශන අරඹා තිබෙනවා.
