ශ්‍රී ලංකාවේ නිල සංචාරයකට එක්ව සිටින ජපානයේ මුදල් අමාත්‍ය Suzuki Shunichi මහතා කටුනායක බණ්ඩාරනායක ජාත්‍යන්තර ගුවන් තොටුපළේ පර්යන්ත 2 හි ඉදිකිරීම් භූමියේ නිරීක්ෂණ චාරිකාවකට සහභාගී වී තිබෙනවා.
අමාත්‍ය Shunichi දෙදින නිල සංචාරයක් සඳහා ඊයේ (11) ශ්‍රී ලංකාවට පැමිණි අතර ගුවන් තොටුපොළේදී ඔහුව උණුසුම් ලෙස පිළිගනු ලැබුවා.
අමාත්‍ය Suzuki Shunichi සහ දූත පිරිස ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් සහ සීමාසහිත ගුවන් තොටුපළ සහ ගුවන් සේවා සමාගමේ සභාපති ඉංජිනේරු අතුල ගල්කැටිය සමඟ ගුවන් තොටුපළේ නිරීක්ෂණයට එක්ව තිබෙනවා.
මෙම සංචාරයේදී ජපාන මුදල් අමාත්‍යවරයා ගුවන් තොටුපොළ සංවර්ධන ව්‍යාපෘතියේ වත්මන් තත්ත්වය සහ ව්‍යාපෘතියේ අනාගතය පිළිබඳව ජ්‍යෙෂ්ඨ නිලධාරීන් සමඟ සාකච්ඡා කරනු ලැබුවා.
කටුනායක ගුවන් තොටුපළ සංවර්ධනය කිරීම සඳහා ජපන් රජය සහ ජපානයේ ජනතාව දක්වන සහයෝගීතාවය සහ මූල්‍ය ආධාර පිළිබඳව අතුල ගල්කැටිය මහතා සිය කෘතඥතාව පළ කළා.
ව්‍යාපෘතිය නැවත ආරම්භ කිරීමට ආයතනයේ සූදානම පිළිබඳවද ඔහු පැහැදිළි කර තිබෙනවා.
අමාත්‍ය සුසුකි ඇතුළු දූත පිරිස පාර්ලිමේන්තුව, ජයවර්ධන මධ්‍යස්ථානය, ශ්‍රී ජයවර්ධනපුර රෝහල, කොළඹ තටාකාංගනය සහ මහරගම ලංකා නිපොන් බිස්ටෙක් ආයතනය නැරඹීමට ද නියමිතයි.
