ශ්රී ලංකා පොලිස් සේවයේ උසස්වීම් ලබාදීමේ දී පොලිස් නිලධාරිනියන්ට අසාධාරණයක් සිදුව ඇති බව ස්ත්රී-පුරුෂ සමතාව සහ සමානාත්මතාවය තහවුරු කිරීමට සහ ඒ පිළිබඳව සොයා බලා සිය නිර්දේශ පාර්ලිමේන්තුවට වාර්තා කිරීම සඳහා වූ පාර්ලිමේන්තු විශේෂ කාරක සභාවේදී අනාවරණය වී තිබෙනවා.
ඒ, අදාළ කාරක සභාව පසුගියදා (07) පාර්ලිමේන්තුවේ දී රැස්වූ අවස්ථාවේදීයි.
මේ වන විට මුළු සේවා කාලය වසර 26ක් සම්පූර්ණ කර ප්රධාන පොලිස් පරීක්ෂක තනතුරේ වසර 04ක් සම්පූර්ණ කළ කාන්තා ප්රධාන පොලිස් පරීක්ෂකවරියන් 92ක් රාජකාරියේ යෙදී සිටියත් ඔවුන්ගේ උසස්වීම් සම්බන්ධව නිශ්චිත ක්රමවේදයක් හෝ පුරප්පාඩු හඳුනා ගැනීමක් මෙතෙක් සිදුකර නැති බව මෙහිදී අනාවරණය වුණා.
මෙම කාන්තා නිලධාරිනියන් බඳවා ගැනීමේ ක්රමවේදය, වැටුප් තලය පිරිමි නිලධාරීන් හා එක සමාන ආකාරයකට වන අතර, පුහුණුව කිසිඳු වෙනසක් නොමැතිව එකම පුහුණු පාසැලක එකට සිදුකරන බවත් පුහුණුවෙන් පසු රාජකාරී යෙදවීම ද වෙනසකින් තොරව එකම ආකාරයට සිදුකරන අතර විශ්රාම යාමේ ක්රමවේදය ද එකම ක්රමයක්.
නමුත් පිරිමි නිලධාරීන්ට උසස්වීම් ලබාදීමේ දී පුරප්පාඩු සම්බන්ධව ගැටලුවක් ඉදිරිපත් නොවන අතර, කාන්තා නිලධාරීන්ට පමණක් මෙම පුරප්පාඩුව සම්බන්ධ ගැටළු සෑම අවස්ථාවකම මතුවෙන බව අගතියට පත් පොලිස් නිලධාරිණියන් විසින් පෙන්වා දෙනු ලැබුවා.
ඒ, සඳහා පිළියමක් ද මෙතෙක් සකස්කර නැති බවත් මේ හේතුව නිසා ජ්යෙෂ්ඨත්වය අඩු පිරිමි නිලධාරීන් උසස්වීම් ලබද්දී කාන්තා නිලධාරිනියන්ට එකම තනතුරේ දීර්ඝ කාලයක් රැඳී සිටීමට සිදුව ඇති බවද මෙහිදී අනාවරණය වුණා.
එමෙන්ම මෙම ගැටළු තත්ත්වය මඟහරවා ගැනීමට ශ්රී ලංකා පොලිසියේ බට සංඛ්යාවෙන් 15%කට වැඩි පිරිසක් කාන්තා නිලධාරිනියන් වන හෙයින් සියලු තනතුරුවල ඒ ඒ තනතුරු වශයෙන් 15%ක කාන්තා නියෝජනයක් සඳහා පුරප්පාඩු ඇති කිරීමට මෙහිදී යෝජනා කෙරුණා.
දැනට පවතින ගැටලුකාරී තත්ත්වය නිරාකරණය කර ගැනීමට එක අවස්ථාවකට බලපාන පරිදි යම් උසස්වීම් ක්රමවේදයක් සකස් කිරීම, ඉහත ක්රමවේදය හෝ වෙනත් සුදුසු ක්රමවේදයක් සකස් කර ඒ ඒ තනතුරුවලට අවශ්ය සුදුසුකම් සපුරා ඇති නිලධාරිණියන් තනතුරුවලට පත්කිරීමට ක්රමවේදයක් සකස් කිරීම, සහ නිශ්චිත ක්රමවේදයකට නිශ්චිත කාල පරාසයක්
තුළදී උසස්වීම් ලබාදීමට සාධාරණ ක්රමවේදයක් සකස් කිරීම යන කරුණු පිළිබඳවද මෙහිදී අවධානය යොමු වුණා.
මහජන ආරක්ෂක අමාත්යාංශයේ නිලධාරීන් පෙන්වා දුන්නේ නව පුරප්පාඩු නිර්මාණය කර ගැනීමේ කරුණු ඇතුළත් යෝජනා කළමණාකරණ සේවා දෙපාර්තමේන්තුව වෙත යවා ඇති බවයි.
මෙහිදී කාරක සභාවේ සභාපතිනිය මහජන ආරක්ෂක අමාත්යාංශයේ ලේකම්වරියට නිර්දේශ කළේ දැනට පොලිස් සේවයේ භට පිරිස් මුලු ප්රමාණයෙන් 15%ක් නිලධාරිනියන් සේවයේ යෙදෙන බැවින් දැනට පවතින පුරප්පාඩු වලින් 15%ක් කාන්තා නිලධාරිණියන් වෙනුවෙන් වෙන් කොට මේ ගැටළුව විසඳන ලෙසයි.
