මග නැගුම ආයතනයේ සේවකයන්ට වන්දි ප්‍රදානය කර එම ආයතනය ඈවර කිරීමට අමාත්‍ය මණ්ඩලය ගෙන තිබෙන තීරණය තුළින් මූලික අයිතිවාසිකම් උල්ලංඝනය වීමක් සිදුවන බවට තීන්දුවක් ලබාදෙන ලෙස ඉල්ලා ගොනු කර තිබෙන පෙත්සමක් පිළිබඳ කරුණු සලකා බැලීම සඳහා ලබන වසරේ ජූලි මස 26 වනදා කැඳවන ලෙස ශ්‍රේෂ්ඨාධිකරණය නියෝග කර තිබෙනවා.
දේශ හිතෛෂී ජාතික ව්‍යාපාරයේ මහලේකම් වසන්ත බණ්ඩාර විසින් මෙම පෙත්සම ගොනු කර තිබූ අතර පෙත්සම්කරු වෙනුවෙන් නීතිඥ කණෂ්ක විතාරණ මහතා කරුණු ඉදිරිපත් කළා.
එහිදී පාර්ශවකරුවන් විසින් ඉදිරිපත් කළ කරුණු සලකා බැලූ ත්‍රිපුද්ගල විනිසුරු මඩුල්ල නියෝග කළේ අදාළ පෙත්සම කරුණු තහවුරු කිරීම සඳහා ලබන වසරේ ජූලි මස 26 වනදා කැඳවන ලෙසටයි.
ප්‍රීති පද්මන් සූරසේන, මහින්ද සමයවර්ධන සහ කුමුදුනි වික්‍රමසිංහ යන මහත්මහත්මින් ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවනු ලැබූවා.
පෙත්සම්කරු කියා සිටින්නේ ලාභ ලබන ආයතනයක් වන මගනැගුම ආයතනයේ සේවකයන්ට වන්දි ප්‍රදානය කර පැවරීම සඳහා අමාත්‍ය මණ්ඩලය විසින් පසුගිය මාර්තු මස 28 දා තීරණයක් ගෙන තිබූ බවයි.
රාජ්‍ය ප්‍රතිපත්තිය යටතේ පාඩු ලබන ආයතන ඈවර කිරීමට රජය වෙත බලය පැවරී තිබුණ ද මග නැගුම ආයතනය ලාභ ලබන ආයතනයක් බැවින් එය ඈවර කිරීම සම්පූර්ණයෙන්ම නීතියට පටහැනි බවත් පෙත්සම්කරු සඳහන් කරනවා.
මේ තුළින් අදාළ ආයතනයේ සේවකයින්ගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසත් පෙත්සම්කරු අධිකරණයෙන් ඉල්ලා තිබෙනවා.
