වයස අවුරුදු 15ක බාල වයස්කාර දැරියක් දූෂණය කළ බව කියන 17 හැවිරිදි තරුණයෙක් ඊයේ (24) දිනයේ අත්අඩංගුවට ගත් බව කල්පිටිය පොලිසිය පවසනවා.
මෙලෙස අත්අඩංගුවට ගැනුණු සැකකරු මදුරන්කුලිය, ජයසිරිගම ප්‍රදේශයේ පදිංචි අයෙක් බවයි වාර්තා වන්නේ.
දූෂණයට ලක්ව ඇති බව කියන පාසල් සිසුවිය පසුගිය ඔක්තොම්බර් 10 වනදා සිය පෙම්වතා බව කියන සැකකරු සමඟ වනාතවිල්ලුව ප්‍රදේශයේ ලැඟුම්හලකට ගොස් එහිදී ඔවුන් දෙදෙනා අඹුසැමි ඇසුරක් පවත්වා ඇති බවයි අනාවරණය වී ඇත්තේ.
මේ සම්බන්ධයෙන් දැරියගේ මව තොරතුරු අනාවරණය කරගෙන ඇති අතර, ඉන් අනතුරුව මෙම සිද්ධිය සම්බන්ධයන් කල්පිටිය පොලීසියට පැමිණිලි කර තිබෙනවා.
එහිදී දැරිය පොලිසියට ලබාදුන් ප්‍රකාශයට අනුව සැකකාර පෙම්වතා අත්අඩංගුවට ගැනීමට කටයුතු කළ බව පොලීසිය සඳහන් කළා.
අත්අඩංගුවට ගැනුණු සැකකාර තරුණයා අද (25) දිනයේ පුත්තලම මහේස්ත්‍රාත්වරයා වෙත ඉදිරිපත් කිරීමට නියමිතයි.
