පසුගියදා මරණයට පත්වූ සෙලින්කෝ සමූහ ව්‍යාපාරයේ අධිපති ලලිත් කොතලාවල මහතාව නීතිඥවරු කණ්ඩායමක් විසින් නිවාස අඩස්සියේ තබා ගෙන සිටි බවට තොරතුරු ලැබී තිබෙන බව ගෝල්ඩන් කී තැන්පත්කරුවන්ගේ සංගමයේ සභාපති මාකෝ පෙරේරා මහතා මහතා ශ්‍රේෂ්ඨාධිකරණය හමුවේ ප්‍රකාශ කර තිබෙනවා.
ගෝල්ඩන් කී සමාගමේ මුදල් තැන්පත් කළ තැන්පත්කරුවන් විසින් ඉදිරිපත් කළ මූලික අයිතිවාසිකම් පෙත්සමකට අදාළ මෝසමක් අද කැඳවූ අවස්ථාවේ දීයි පෞද්ගලිකව පෙනී සිටිමින් එම සංගමයේ සභාපතිවරයා මෙම කරුණු ඉදිරිපත් කළේ.
එස්. තුරෙයිරාජා, අචල වෙංගප්පූලි සහ ප්‍රියන්ත ප්‍රනාන්දු යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම නඩුව කැඳවනු ලැබුවා.
එම මෝසම කැඳවූ අවස්ථාවේදී ගෝල්ඩන් කී තැන්පත්කරුවන්ගේ සංගමයේ සභාපති මාකෝ පෙරේරා මහතා අධිකරණය හමුවේ කරුණු දක්වමින් කියා සිටියේ ලලිත් කොතලාවල මහතා මිය යාමට පෙර නීතිඥවරු කණ්ඩායමක් විසින් ඔහුගේ නිවසේ නිවාස අඩස්සියේ තබා ගෙන සිටි බවට තොරතුරු දැනගන්නට ලැබී ඇති බවයි.
ඒ පිළිබඳව සහ තම තැන්පතු පිළිබදව කරුණු දැක්වීමට අවස්ථාවක් ලබා දෙන ලෙසත් ඔහු අධිකරණයෙන් ඉල්ලා සිටියා.
ඊට පිළිතුරු දුන් ත්‍රිපුද්ගල විනිසුරු මඩුල්ලේ සභාපති විනිසුරු තුරෙයිරාජා මහතා කියාසිටියේ මෙය ශ්‍රේෂ්ඨාධිකරණය බවයි.
ශ්‍රේෂ්ඨාධිකරණය හමුවේ ඕනෑම පුද්ගලයකුට පැමිණෙන ඕනෑම අවස්ථාවක කරුණු දැක්වීමට හැකියාවක් නොමැති බවත් ඔහු සඳහන් කළා.
ඒ සඳහා පූර්ව අවසරයක් ලබා ගත යුතු බව පෙන්වා දුන් විනිසුරුවරයා අතරමැදි පාර්ශ්වකරුවකු වශයෙන් ඊට අවශ්‍ය අනුමැතිය ලබාගෙන තිබේ දැයි විමසා සිටියා. ඊට පිළිතුරු දෙමින් ඔහු සඳහන් කළේ එවැනි අවසරයක් ලබාගෙන නොමැති බවයි.
ඒ අනුව මෝසමක් ගොනු කොට නිසි අවසරය ලබාගෙන ඊට අදාළව ඉදිරියේ දී කරුණු දැක්වීමට පියවර ගන්නා ලෙසත් විනිසුරුවරයා ගෝල්ඩන් කී සංගමයේ සභාපතිවරයාට නියෝග කළා. ඉන් අනතුරුව අදාළ පෙත්සම මැයි මස 8 වනදා දක්වා කල් තැබුණා.
