බංග්ලාදේශයේ විපක්ෂ නායකවරයා සහ ඔහුගේ පක්ෂයේ සාමාජිකයින් විශාල පිරිසක් ඩකා නුවර පැවති ආණ්ඩු විරෝධී ප්‍රචණ්ඩකාරී විරෝධී විරෝධතාවල දී අත්අඩංගුවට ගෙන තිබෙනවා.
එරට අගමැතිනි ෂීක් හසීනාට ඉල්ලා අස්විය යුතු යැයි බලකරමින් සති අන්තයේ දස දහස් සංඛ්‍යාත විරෝධතාකරුවන් ඩකා නුවර විරෝධතාවන්ට එක්ව සිටියා.
මෙම විරෝධතාවලින් එක් පොලිස් නිලධාරියෙක් සහ විරෝධතාකරුවෙක් මියගොස් ඇති බවයි විදෙස් මාධ්‍ය වාර්තා කරන්නේ.
බංග්ලාදේශ විපක්ෂ නායක අලම්ගීර් අත්අඩංගුවට ගැනීමට හේතුව සම්බන්ධයෙන් මේ වනවිට පරස්පර වාර්තා නිකුත් වී තිබෙනවා.
බංග්ලාදේශ අගවිනිසුරුවරයාගේ නිවසට එල්ල වූ බව කියන ප්‍රහාරයක් සම්බන්ධයෙන් විපක්ෂ නායකවරයා මෙලෙස අත්අඩංගුවට ගෙන ඇති බව ඇතැම් මාධ්‍ය වාර්තා කරනවා.
කෙසේ වෙතත් AFP ප්‍රවෘත්ති ඒජන්සිය පැවසුවේ සෙනසුරාදා විරෝධතාවයේ දී පොලිස් නිලධාරියෙකු මිය යාමෙන් පසු මිනීමැරුම් චෝදනාවකට විපක්ෂ නායකවරයාට සහ ඔහුගේ පක්ෂයේ තවත් සාමාජිකයින් 64 දෙනෙකුට චෝදනා එල්ල වී ඇති බවයි.
මෙම විරෝධතා අතර තුර විරෝධතාකරුවන් පොලිසිය සමඟ ඇති වූ ගැටුම්වල දී විශාල පිරිසක් තුවාල ලබා තිබෙනවා.
එළඹෙන ජනවාරි මාසයේ දී මැතිවරණයක් පැවැත්වීමට නියමිතව තිබියදී, අගමැතිනී ෂීක් හසීනාට එරෙහිව විරෝධතා පවත්වමින්, ඇයට ඉල්ලා අස්වන ලෙසත් මධ්‍යස්ථ රජයක් යටතේ ඡන්දයක් පවත්වන ලෙසත් විරෝධතාකරුවන් ඉල්ලා සිටිනවා.
