අලදෙණිය උල්ලඳුපිටිය මීමැසි උද්‍යානය ආසන්නයේ දී හක්කපටස් එකක් පෑගීමෙන් පිරිමි ළමයෙකු තුවාල ලබා තිබෙනවා.
එම ප්‍රදේශයේ නිවසක පදිංචිව සිටි 15 හැවිරිදි පිරිමි ළමයෙකු නිවස අසල මාර්ගයේ තිබූ බෝලයක් වැනි යමක් දැක එය පෑගීමේදී පුපුරා ගොස් ඇති බවටයි අනාවරණ වී ඇත්තේ.
එහිදී මෙම පිරිමි ළමයාගේ දකුණු පාදයේ ඇගිලිවලට තුවාල සිදුවී තිබෙනවා.
එම අවස්ථාවේ රාජකාරී කටයුත්තක් සඳහා ගමන් කරමින් සිටි පොලිස් නිලධාරිනියක් විසින් තුවාල ලැබූ දරුවා තිත්තපජ්ජල රජයේ රෝහලට ඇතුලත් කිරීමෙන් පසු වැඩිදුර ප්‍රතිකාර සඳහා මහනුවර රෝහලට ඇතුලත් කර ඇති බවයි පොලිසිය කියාසිටියේ.
අනතුරුව පොලිසිය විසින් එම පිපිරීම සිදු වූ ස්ථානය අවට පරීක්ෂාවට ලක් කර ඇති අතර ඒ ආසන්නයේ තිබූ නිවසක් පරීක්ෂා කිරීමේදී මෙරට නිෂ්පාදිත හක්කපටස් 9ක් සමග අදාළ නිවසේ කුලී පදනම මත පදිංචිව සිටි පුද්ගලයෙකු සහ ඔහු සමග රැඳී සිටි තවත් අයෙකු අත්අඩංගුවට ගෙන තිබෙනවා.
සැකකරුවන් අවුරුදු 25 සහ 27 වයස්වල පසුවන ගලෙන්බිඳුනු වැව ප්‍රදේශයේ පදිංචිකරුවන්.
ඔවුන් සම්බන්ධයෙන් සිදු කරන ලද වැඩිදුර විමර්ශනයේදී අනාවරණ වී ඇත්තේ සතුන් දඩයම් කිරීම සඳහා මෙම හක්කපටස් නිෂ්පාදනය කර ඇති බවටයි.
ඉවත දමන කුකුල් මස් කොටස් මිශ්‍ර කර සකස් කරන හක්කපටස් සැකකරුවන් විසින් ඌරන් ගැවසෙන ස්ථානවල තබන බවටයි පොලිසිය හෙළි කරගෙන ඇත්තේ.
එලෙස තැබූ හක්කපටස් එකක් වර්ෂාවත් සමග පාරට ගසාගෙන පැමිණ ඇති අතර මෙම සිසුවා පාගා ඇත්තේ එය බවට අනාවරණ වී තිබෙනවා.
තුවාල ලැබූ පිරිමි ළමයාගේ පාදයට සැත්කමක් සිදු කිරීමට නියමිත බව සඳහන්.
අලදෙණිය පොලිසිය සැකකරුවන් සම්බන්ධයෙන් වැඩිදුර විමර්ශන සිදු කරනවා.
