රජය විසින් පාර්ලිමේන්තුවේ න්‍යාය පුස්තකයට ඇතුළත් කර තිබෙන ත්‍රස්ත විරෝධී පනත් කෙටුම්පතේ අන්තර්ගත ඇතැම් විධිවිධාන වලින් ආණ්ඩුක්‍රම ව්‍යවස්ථාව මඟින් සනාථ කර තිබෙන මූලික මිනිස් අයිතිවාසිකම් උල්ලංඝනය වන බවට තීන්දුවක් ලබාදෙන ලෙස ඉල්ලා ශ්‍රේෂ්ඨාධිකරණයට පෙත්සමක් ඉදිරිපත් කර තිබෙනවා.
ජාතික ජනබලවේගයේ පාර්ලිමේන්තු මන්ත්‍රී විජිත හේරත් විසින් පෙත්සම ඉදිරිපත් කළා.
එහි වගඋත්තරකරු ලෙස නීතිපතිවරයා නම් කර තිබෙනවා.
පෙත්සම්කාර විජිත හේරත් මන්ත්‍රීවරයා කියා සිටින්නේ රජය විසින් ත්‍රස්ත විරෝධී පනත් කෙටුම්පත ඉකුත් ඔක්තෝම්බර් මස 03 වනදා පාර්ලිමේන්තුවේ න්‍යාය පුස්තකයට ඇතුළත් කර ඇති බවයි.
එම පනත් කෙටුම්පතේ අන්තර්ගතය ඇතැම් විධිවිධාන වලින් ආණ්ඩුක්‍රම ව්‍යවස්ථාවේ තුන්වන වගන්තියේ සඳහන් ජනතා පරමාධිපත්‍ය උල්ලංඝනය වන බවත් පෙත්සමේ සඳහන් කර තිබෙනවා.
ඊට අමතරව පුද්ගල නිදහස, භාෂණයේ හා ප්‍රකාශනයේ නිදහස ඇතුළු ආණ්ඩුක්‍රම ව්‍යවස්ථාවේ සහතික කර තිබෙන මූලික මිනිස් අයිතිවාසිකම් උල්ලංඝනය වීමක් සිදුවන බවත් වැඩිදුරටත් සඳහන් කර තිබෙනවා.
මෙම පනත් කෙටුම්පත හරහා ආරක්ෂක අංශ සාමාජිකයින්ට අත්තනෝමතික බලයක් පැවරෙන අතර එම තත්ත්වය රටේ නීතියේ ආධිපත්‍යයේ පැවැත්මට විශාල බාධාවක් බවත් පෙත්සම්කරු කියා සිටිනවා.
එබැවින් අදාළ පනත් කෙටුම්පත සම්මත කිරීමට අවශ්‍ය නම් පාර්ලිමේන්තුවේ තුනෙන් දෙකක බහුතර ඡන්දයකින් සම්මත වී එය ජනමත විචාරණයකින් ද අනුමත විය යුතු බවට තීන්දුවක් ලබාදෙන ලෙසත් පෙත්සම්කරු ශ්‍රේෂ්ඨාධිකරණයෙන් වැඩිදුරටත් ඉල්ලා තිබෙනවා
