දකුණු දිග කේරළ ප්‍රාන්තයේ පුද්ගලයන් දෙදෙනෙකුට මරු කැඳවූ මාරාන්තික නිපා (Nipah) වෛරසය පැතිරීම නතර කිරීම සඳහා ඉන්දීය බලධාරීන් දැවැන්ත මෙහෙයුමක් ආරම්භ කර තිබෙනවා.
මේ වන විට මහජන රැස්වීම් සීමා කර ඇති අතර ඇතැම් පාසල් පසුගිය සතියේ සිට වසා දමා ඇති බවයි සෞඛ්‍ය බලධාරීන් ප්‍රකාශ කළේ.
මෙය 2018 වසරෙන් පසු කලාපයේ 4 වන වෛරස පැතිර යාම ලෙසටයි සැලකෙන්නේ.
නිපා වෛරසය ඉන්දියාවේ මෙන්ම තවත් රටවල් රැසක ව්‍යාප්ත වී ඇති අතර බංගලාදේශය, සිංගප්පූරුව සහ පිලිපීනය යන රටලින් ද අසධිතයන් හඳුනාගෙන ඇති බවයි විදෙස් මාධ්‍ය වාර්තාවල සඳහන්.
නිපා වෛරසය කේරළ ප්‍රාන්තයේ පැතිර යමින් පවතින්නේ සිව්වන වතාවට වන බව ඉන්දීය මාධ්‍ය වාර්තා කළා.
නිපා යනු Paramyxoviridae පවුලට අයත් RNA වෛරසයක් වන අතර මෙය අනාවරණය වූ පළමු රට මැලේසියාවයි.
රෝග ලක්ෂණ ලෙස උණ, දැඩි හිසරදය, නිදිබර ගතිය සහ ව්‍යාකූලත්වය මෙන්ම ඇතැම් අයට පපුවේ ආසාදන තත්ත්වයන් ද ඇතිවිය හැකියි.
මෙම වෛරසය මිනිසුන්ට සම්ප්‍රේෂණය වී ඇත්තේ වවුලන් සහ නරියන්ගෙන් බවටයි වාර්තා වන්නේ.
මෙම වෛරසය මිනිසුන්ට සම්ප්‍රේෂණ වීමේ අවධානම ඉහළ බව විදෙස් මාධ්‍ය වාර්තා කර තිබෙනවා.
Nipah යනු මිනිසුන්ට උණ, වමනය සහ ශ්වසන ආසාදන ඇති කළ හැකි දුර්ලභ එහෙත් අසාධනය වුවහොත් බරපතල විය හැකි වෛරසයක්.
එහි දරුණු අවස්ථාවල දී එන්සෙෆලයිටිස්, මොළයේ දැවිල්ල සහ කෝමා තත්ත්වයට හේතු විය හැකි බවටයි අනාවරණ වී ඇත්තේ.
ලෝක සෞඛ්‍ය සංවිධානයට (WHO) අනුව වෛරසයේ මරණ අනුපාතය 40-75% අතර වනවා. මෙම වෛරසයට දැනට කිසිදු ඖෂධයක් සොයාගෙන නොමැති අතර සාමාන්‍ය ප්‍රතිකාරය වන්නේ රෝග ලක්ෂණවලට ප්‍රතිකාර ලබා දීමයි.
