ජනාධිපති රනිල් වික්රමසිංහ මහතා සහ මැලේසියා අගමැති අන්වර් බින් ඊබ්රහීම් (Anwar bin Ibrahim) මහතා අතර නිල හමුව එක්සත් ජාතීන්ගේ මහ මණ්ඩල සැසිවාරයට සමගාමීව ඊයේ (20) නිව්යෝර්ක් නුවරදී සිදු වුණා.
ජනාධිපති මාධ්ය අංශය සඳහන් කළේ ශ්රී ලංකාව සහ මැලේසියාව අතර ආර්ථික සහ වෙළඳ සබඳතා ශක්තිමත් කර ගැනීම පිළිබඳ මෙහිදී නායකයන් දෙපළ දීර්ඝ ලෙස සාකච්ඡා කළ බවයි.
ශ්රී ලංකාවේ නව ආයෝජන අවස්ථා සඳහා මැලේසියානු සමාගම් උනන්දු කරවන බව පැවසූ අග්රාමාත්ය අන්වර් ඊබ්රහිම් මහතා මැලේසියාව සමඟ නිදහස් වෙළෙඳ ගිවිසුමක් ඇති කර ගැනිමට ශ්රී ලංකාව කළ ඉල්ලීම පිළිබඳව ද ධනාත්මක ප්රතිචාරයක් දක්වා තිබෙනවා.
එසේම කලාපීය විස්තීරණ ආර්ථික හවුල්කාරිත්වයේ (RCEP) සාමාජිකත්වය ලබා ගැනීමට ශ්රී ලංකාව කර තිබෙන ඉල්ලීමට සහය දැක්වීමට මැලේසියානු අග්රාමාත්යවරයා එකඟ වුණා.
ලබන මාසයේ දී කොළඹදී පැවැත්වීමට නියමිත ඉන්දියානු සාගර වටද්දර සංගමයේ (IORA) කලාපීය සමුළුව සඳහා මැලේසියා විදේශ අමාත්යවරයා සහභාගී කරවන බවයි අග්රාමාත්ය අන්වර් බින් ඊබ්රහීම් මහතා මෙහිදී වැඩිදුරටත් සඳහන් කළේ.
මැලේසියාවේ සංචාරයක නිරතවන ලෙස මැලේසියාවේ රජතුමා විසින් කළ ආරාධනය ද මැලේසියානු අග්රාමාත්යවරයා විසින් ජනාධිපති රනිල් වික්රමසිංහ මහතාට දැනුම් දෙනු ලැබුවා. එය පිළිගත් ජනාධිපති රනිල් වික්රමසිංහ මහතා ලබන වසරේ මැලේසියාවේ සංචාරය සඳහා පැමිණෙන බවයි තහවුරු කර ඇත්තේ.
