මාර්ග අංක 187 ගුවන් තොටුපොළ – කොටුව සුඛෝපභෝගී බස් රථයකට මගී ප්‍රවාහන අවසර පත්‍රයේ සඳහන් මාර්ගයෙන් බැහැරව ගමන් කිරීමේ චෝදනාව මත රුපියල් 75,000ක දඩ මුදලක් ගෙවන ලෙස නියෝග කර තිබෙනවා.
පසුගිය අගෝස්තු මස 15 වනදා සුඛෝපභෝගී බස් රථයක් මගීන් සමග අවසර පත්‍රයේ සඳහන් මාර්ගයෙන් බැහැරව පැමිණ 18 කණුව ක්‍රීඩාංගණය අසළ නතර කරගෙන සිටියදී කටුනායක පොලිසියේ නිලධාරීන් විසින් සිදු කළ සොයා බැලීමකින් අනතුරුවයි අධිකරණයේ නඩුවක් පවරා ඇත්තේ.
1991 අංක 37 දරන ජාතික ගමනාගමන කොමිෂන් සභා පනතේ 24 වගන්තියේ කොන්දේසි උල්ලංඝනය කරමින්, අවසර පත්‍රයේ සදහන් මාර්ගයෙන් බැහැරව 18 කණුව අතුරු මාර්ගයේ සිය බස් රථය ධාවනය කරමින් එම පනතේ 40 (ඊ) වගන්තිය යටතේ දඩුවම් ලැබිය හැකි වරදක් සිදු කිරීමේ චෝදනාව යටතේ එම නඩුව පවරා තිබුණා.
ඒ අනුව අදාළ බස් රථය පැදවූ රියැදුරාට මීගමුව මහේස්ත්‍රාත් දර්ශනී ප්‍රේමරත්න මහත්මිය නියෝග කර ඇත්තේ රුපියල් 75,000ක දඩ මුදලක් ගෙවන ලෙසටයි.
පසුගිය මස 26 වනදා සිට 28 වනදා දක්වා මෙම අතුරු මාර්ගයේ තම සුඛෝපභෝගී බස් රථ ධාවනය කිරීමට අවසර ඉල්ලා වැඩ වර්ජනයක් ද මෙම මෙම බස් රථ සේවකයන් විසින් ක්‍රියාත්මක කර තිබුණා.
එම වර්ජනය හේතුවෙන් කටුනායක ගුවන් තොටුපොළ, කටුනායක නිදහස් වෙළෙඳ කළාපය සහ ගුවන් තොටුපොළ ගුවන් භාණ්ඩ ගම්මානය වෙත පැමිණෙන මගීන් දැඩි අසීරුතාවයකට පත් වුණා.
