ලංකා ප්රිමියර් ලීග් තරගාවලියේ තවත් තියුණු තරගයක් ඊයේ (13) රාත්රියේ අවසන් වුණේ කලම්බෝ ස්ට්රයිකස් කණ්ඩායමට ජයගෙන එමින්.
මෙවර තරගාවලියේ ප්රබලතම කණ්ඩායම බවට පත්ව සිටින බී ලව් කැන්ඩි කණ්ඩායම පරාජය කරමින් කලම්බෝ ස්ට්රයිකස් කණ්ඩායම මෙම තරගය ජය ගත්තේ ලකුණු 09කින්.
කලම්බෝ ස්ට්රයිකස් ලැබූ මෙම ජයත් සමඟ තරගාවලියේ ප්රසාද ලකුණු සටහන තවත් තියුණු මුහුණුවරක් ගෙන තිබීම ද විශේෂත්වයක්.
ඊයේ පැවති මෙම තරගයේ දී කලම්බෝ ස්ට්රයිකස් කණ්ඩායමේ නිත්ය නායක නිරෝෂන් දික්වැල්ල ක්රීඩා නොකර අතර, කණ්ඩායම මෙහෙයවීමේ වගකීම පැවරී තිබුණේ තුන් ඉරියව් ක්රීඩක චාමික කරුණාරත්න හටයි.
මෙම තරගයේ දී වමත් ප්රහාරක පිතිකරුවෙක් වන නිපුන් ධනංජය කලම්බෝ කණ්ඩායමට කැඳවා තිබූ අතර, එම කැඳවීමට උපරිම සාධාරණයක් කරමින් ඔහු සිය මංගල එල්.පී.එල්. තරගයේ දීම වේගවත් ලකුණු 40ක් පන්දු 29ක් තුළ රැස්කළා.
ඊයේ තරගයේ දී කලම්බෝ කණ්ඩායමේ නායකත්වය දැරූ චාමිකගේ තීරණයකට අනුව නිපුන් ධනංජය මෙලෙස කණ්ඩායමට කැඳවා තිබූ බවයි වාර්තා වුණේ.
මේ අතර කලම්බෝ ස්ට්රයිකස් කණ්ඩායම නියෝජනය කරන පාකිස්ථාන ක්රීඩක ඉෆ්තිකාර් අහමඩ්ට පන්දු යැවීමට අවස්ථාව ලබදීම ඊයේ තරගයේ දී දැකගත හැකි වුණා.
පෙර තරගවල පිතිකරුවෙක් ලෙස පමණක් කටයුතු කළ ඉෆ්තිකාර් ඊයේ තරගයේ දී පන්දු යවන්නෙකු ලෙසද යොදවා ගැනීම සැලැස්ම වී තිබූ බව චාමික කරුණාරත්න සඳහන් කළා.
