වික්ටෝරියා ජලාශයේ ජලය ලීටර් මිලියන තුනක් දෛනිකව වාෂ්ප වන බව හෙළි වෙයි

පවතින අධික වියළි කාලගුණික තත්ත්වයත් සමඟ වික්ටෝරියා ජලාශයේ ජලය ලීටර් මිලියන 3ක් දෛනිකව වාෂ්ප වන බව එහි කාර්යභාර ඉංජිනේරු වසන්ත ඇහැලපිටිය පවසනවා.

මේ වනවිට ජලාශයේ පිරී ඇති වර්ග කිලෝ මීටර් 11ක වපරිසයෙන් යුත් පෘෂ්ඨයේ මිලි මීටර් 05ක් උසට ඇති ජල ප්‍රමාණය දෛනිකව වාෂ්ප වන බවයි ඔහු පෙන්වා දෙන්නේ.

වික්ටෝරියා ජලාශය පිරී තිබෙන ජල පරිමාවෙන් මිලී මීටර් දෙකක පමණ උසට ඇති කොටසක් සාමාන්‍යයෙන් වාෂ්ප වන අතර පවතින වියළි කාලගුණික තත්ත්වයත් සමඟ එම ප්‍රමාණය මේ වනවිට දෙගුණයකටත් වඩා ඉහළ ගොස් තිබෙන බව කාර්යභාර ඉංජිනේරුවරයා ප්‍රකාශ කළා.

වික්ටෝරියා ජලාශය සම්පූර්ණයෙන් ජලයෙන් පිරිණු විට වර්ග කිලෝ මීටර් 24ක වපසරියකින් සමන්විත වනවා.

ජලය අඩු වීම හේතුවෙන් මේ වනවිට වර්ග කිලෝ මීටර් 13ක ප්‍රමාණයක ජලය නොමැති බව ඇහැලපිටිය මහතා සඳහන් කළා.

ජර්මනිය, ප්‍රංශය, කොරියාව, චීනය වැනි රටවල් ජලය මත පාවන සූර්ය පැනල සවි කිරීම මගින් මෙම වාෂ්ප වන ජල ප්‍රමාණය අඩුකර ගැනීමට පියවර ගෙන ඇති අතර ඊට අමතරව ඔවුන් එමඟින් අමතර විදුලි නිෂ්පාදනයක් ද සිදු කරන බවයි හෙතෙම අවධාරණය කළේ.

ජලාශය මත සූර්ය පැනල එලීම මගින් ජලයේ සිටින මසුන්ට ද හිතකර පරිසරයක් නිර්මාණය වන බව කාර්යභාර ඉංජිනේරුවරයා සඳහන් කළා.