නවීකරණය කෙරුණු උතුරු දුම්රිය මාර්ගය කේන්ද්‍ර කර ගනිමින් ගල්කිස්ස සිට යාපනය හා කන්කසන්තුරේ දක්වා ධාවනය කෙරෙන යාල් නිලා රාත්‍රී සීඝ්‍රගාමී සුඛෝපබෝගී සංචාරක දුම්රිය ගමන් ආරම්භ කර තිබෙනවා.
ඊයේ (04) එම දුම්රිය කන්කසන්තුරේ දක්වා ධාවනය කොළඹ කොටුව දුම්රිය ස්ථානයේ දී නිල වශයෙන් ආරම්භ කෙරුණේ ප්‍රවාහන අමාත්‍ය බන්දුල ගුණවර්ධනගේ ප්‍රධානත්වයෙන්.
දෙස් විදෙස් සංචාරකයින් ඇතුලු මගීන් රැසක් මෙම ආරම්භක දුම්රිය ගමන සඳහා එක්ව සිටියා.
උතුරු දුම්රිය මාර්ගයේ නවීකරණ කටයුතුවලින් අනතුරුව දුම්රිය ගමනා ගමනය වෙනුවෙන් විවෘත කිරීමත් සමඟ පසුගියදා අමාත්‍යවරයා ඇතුලු නිලධාරීන් නිරීක්ෂණ ධාවනයකට ද එක් වූ අතර ඊයේ සාමාන්‍ය පරිදි මගී ජනතාව වෙනුවෙන් යාල් නිලා දුම්රිය ගමන් ආරම්භ කිරීම සිදු වුණා.
ඒ අනුව කොළඹ කොටුවෙන් රාත්‍රී 10ට ගමන් ආරම්භ කරන දුම්රිය පෙරවරු 05.52ට කන්කසන්තුරේ වෙත ළඟා වීමට නියමිතයි.
එමෙන්ම රාත්‍රී 09.30ට කන්කසන්තුරේ සිට පිටත් වන දුම්රිය ගල්කිස්සට ළඟා වන්නේ පෙරවරු 05.36ටයි.
නවීන, අති සුඛෝපභෝගී පහසුකම්වලින් සමන්විත යාල් නිලා දුම්රියට වායු සමීකරණය කරන ලද ප්‍රථම සහ දෙවන පන්තියේ මැදිරි, සනීපාරක්ෂක පහසුකම්, භෝජනාගාර ඇතුලු පහසුකම් ද ඇතුලත්.
ඉදිරියේදී පැවැත්වෙන නල්ලූර් කෝවිල් මංගල්‍යය ඇතුලු හින්දු ආගමික ස්ථාන වන්දනා කිරීමට පැමිණෙන දෙස් විදෙස් බැතිමතුන් ඇතුලු සංචාරකයින් අතර මෙම දුම්රිය බොහෝ සෙයින් ජනප්‍රිය වනු ඇති බවටයි අමාත්‍ය බන්දුල ගුණවර්ධන විශ්වාසය පළ කළේ.
