පොලිස් හදිසි ඇමතුම් අංශය (119) වෙත අසත්‍ය සහ සාවද්‍ය තොරතුරු ලබාදෙන පුද්ගලයන් සම්බන්ධයෙන් නීතිය දැඩිව ක්‍රියාත්මක කරන බව පොලිසිය අවධාරණය කරනවා.
එවැනි වරදකට වරදකරු වන පුද්ගලයෙකුට මාස 6ක් දක්වා කාලයක බන්ධනාගාර ගත කිරීමක් හෝ දඩයක් හෝ එම දඩුවම් දෙකෙන්ම දඩුවම් කළ යුතු බවට නීතිමය ප්‍රතිපාදන පවතින බවටයි පොලිසිය දැනුම් දෙන්නේ.
නිවේදනයක් නිකුත් කරමින් පොලිසිය සඳහන් කළේ හදිසි ඇමතුම් අංශයට දිනකට පණිවුඩ 3000ත් 3500ත් අතර ප්‍රමාණයක් ලැබෙන බවටයි.
එලෙස දෛනිකව ලැබෙන පණිවුඩ විශ්ලේෂණය කිරීමේදී නිරීක්ෂණය වී ඇත්තේ 119 දුරකථන අංකය අවභාවිතා කරමින් මහජනතාව විසින් අසත්‍ය තොරතුරු ඇතුලත් පණිවුඩ ලබාදීමට කටයුතු කරන බවටයි.
ඒ හේතුවෙන් ඉතා වැදගත් මෙන්ම කඩිනමින් ක්‍රියාත්මක විය යුතු දුරකථන පණිවුඩ සඳහා ක්‍රියාත්මක වීමේදී යම් බාධාවක් ප්‍රමාදයක් සිදුවිය හැකි බව පොලිසිය පෙන්වා දෙනවා.
එබැවින් මෙම අංකය අවභාවිතයට නොගෙන ප්‍රමුඛතාවය සහ ඉතා අවශ්‍ය වූ තොරතුරු ලබාදී කඩිනමින් ක්‍රියාත්මක විය යුතු සිදුවීම් පිළිබඳ පමණක් දැනුවත් කිරීමට මෙම අංකය භාවිත කරන ලෙසටයි පොලිසිය ජනතාවට දැනුම් දෙන්නේ.
