රජය විසින් පාර්ලිමේන්තුවට ඉදිරිපත් කර තිබෙන “ආයුර්වේද සංශෝධන පනත් කෙටුම්පත” ආණ්ඩුක්‍රම ව්‍යවස්ථාවට පටහැනි යැයි තීන්දු කොට එය සම්මත කිරීමට අවශ්‍ය නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන ලෙස ඉල්ලා ශ්‍රේෂ්ඨාධිකරණය හමුවේ පෙත්සමක් ගොනු කර තිබෙනවා.
පාරම්පරික ආයුර්වේද වෛද්‍යවරයෙකු වන බී. ඒ. රත්නපාල මහතා විසිනුයි මෙම පෙත්සම ගොනු කර ඇත්තේ.
එහි වගඋත්තරකරු ලෙස නීතිපතිවරයා නම් කර තිබෙනවා.
නීතිඥ අරුණ ලක්සිරි උණවටුන මහතා මාර්ගයෙන් ඉදිරිපත් කර ඇති මෙම පෙත්සම තුළින් සඳහන් කර තිබෙන්නේ ආයුර්වේද පනතට නව සංශෝධන එක් කිරීම සඳහා සංශෝධිත පනත් කෙටුම්පතක් පසුගිය 05 වනදා රජය විසින් පාර්ලිමේන්තු න්‍යාය පත්‍රයට ඇතුළත් කළ බවයි.
ආණ්ඩුක්‍රම ව්‍යවස්ථාවේ 13 වන සංශෝධනයට අනුව ආයුර්වේද විෂය පළාත් සභාවට අනුයුක්ත විෂයක් බැවින් මෙම පනත් කෙටුම්පත පාර්ලිමේන්තුවට ඉදිරිපත් කිරීමට පෙර රජය විසින් පළාත් සභාවල අදහස් විමසීමක් සිදු කර නොමැති බවත් පෙත්සමේ සඳහන් කර තිබෙනවා.
ඒ අනුව අදාළ පනත් කෙටුම්පතේ අන්තර්ගත වගන්ති බොහොමයක් ආණ්ඩුක්‍රම ව්‍යවස්ථාවට පටහැනියි බවයි පෙත්සම්කරු කියා සිටින්නේ.
අදාළ සංශෝධන පනත් කෙටුම්පතෙහි 2, 3, 4, 9, 10, 29, 31, 32 ,42, 44 සහ 46 යන වගන්ති සම්මත කිරීමට අවශ්‍ය නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසත් පෙත්සම්කරු ශ්‍රේෂ්ඨාධිකරණයෙන් ඉල්ලා සිටිනවා.
