පයාගල පොලිස් වසමේ සිදු වූ නිවාස බිඳුම් රැසක් සම්බන්ධයෙන් අවශ්‍යව සිටි සැකකරුවෙක් ඊයේ (03) කළුතර කොට්ඨාස අපරාධ විමර්ශන අංශය මඟින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ ‘පොතුවිල කලුවා’ නමින් හඳුන්වන 22 හැවිරිදි වියේ පසුවන්නෙක්.
ගෙවුණු වෙසක් සහ පොසොන් සමයේ සැකකරු විසින් මෙම සොරකම් රැසක් සිදුකර ඇති බවයි සිදුකළ විමර්ශනවල දී අනාවරණය වී ඇත්තේ.
මෙම පුද්ගලයා කිසිඳු රැකියාවක් නොකර දේපළ රැසක් රැස්කර ගැනීම සම්බන්ධයෙන් සැකසිතී මොහුව අත්අඩංගුවට ගෙන සිදුකළ ප්‍රශ්න කිරීම්වල දී සියලු තොරතුරු අනාවරණය කරගෙන තිබෙනවා.
මොහු විසින් සොරාගන්නා ලද ලක්ෂ විස්සකට ආසන්න රන් භාණ්ඩ, ජංගම දුරකථන කිහිපයක් පොලිස් භාරයට ගෙන ඇති බවයි වාර්තා වුණේ.
එම රන් භාණ්ඩ විවිධ ප්‍රදේශවලට විකුණා තිබිය දී පොලීසිය විසින් සොයා ගෙන ඇති අතර, ඒවායින් බොහොමයක් උණුකර වෙනත් නිෂ්පාදන සඳහා යොදාගෙන තිබූ බවයි පොලිසිය පැවසුවේ.
සොරකමින් උපයා ගන්නා ලද මුදල් වලින් මිලදී ගත් අධික වටිනාකම ඇති යතුරුපැදියක් ද පොලිස් භාරයට ගෙන ඇති අතර,සැකකරු අද (04) කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
wpDiscuz
