දන්සලක් අසල ඇති වූ බහින්බස් වීමක් දුරදිග යාමෙන් තරුණයෙකු ඝාතනයට ලක්ව තිබෙනවා.
ඊයේ (03) සවස ඇහැළියගොඩ පන්නිල ප්‍රදේශයේ දන්සලක් අසලදීයි මෙම ඝාතනය සිදුවී ඇත්තේ.
සිද්ධිය සම්බන්ධයෙන් ඇහැලියගොඩ රෝහල් පොලිසිය මගින් ලබාදුන් පණිවුඩයකට අනුව ඇහැලියගොඩ පොලිසිය මගින් විමර්ශන ආරම්භ කර තිබෙනවා.
මියගොස් ඇත්තේ පන්නිල ප්‍රදේශයේම පදිංචි 23 හැවිරිදි තරුණයෙක්.
එම තරුණයාගේ ඥාතීන් ඊයේ දිනයට යෙදී තිබූ පොසොන් පොහොය දිනය වෙනුවෙන් සුප් දන්සලක් ලබාදීමට සූදානම් කර තිබෙනවා.
එම ස්ථානයට පැමිණි මෙම තරුණයා ඔහුගේ පසුම්බියේ තිබූ මුදල් නොමැති බවට ප්‍රකාශ කරමින් ආරවුලක් ඇති කරගෙන ඇති බවටයි පොලිසිය කළ විමර්ශනයේදී අනාවරණ වී ඇත්තේ.
පසුව එම ස්ථානයේ සිටි පුද්ගලයෙකු විසින් තියුණු ආයුධයකින් කළ පහරදීමකින් මෙම ඝාතනය සිදුවී ඇතැයි හෙළිවී තිබෙනවා.
මියගිය තරුණයා මත්ද්‍රව්‍ය සඳහා ඇබ්බැහි වූ අයෙකු බවට ද දැනට සිදු කර ඇති විමර්ශනයේදී අනාවරණ වී ඇති බවයි පොලිසිය සඳහන් කළේ.
ඝාතනයට සම්බන්ධ සැකකරු හඳුනාගෙන ඇති අතර ඔහු අත්අඩංගුවට ගැනීම සඳහා ඇහැලියගොඩ පොලිසිය විමර්ශන ආරම්භ කර තිබෙනවා.
