ජනාධිපති රනිල් වික්‍රමසිංහ මහතා මීට සුළු මොහොතකට පෙර ජපානයේදී ජපාන අග්‍රාමාත්‍ය ෆුමිඕ කිෂිඩා මහතා සමඟ ද්විපාර්ශ්වික සාකච්ඡා සිදු කර තිබෙනවා.
ආර්ථික අර්බුදයෙන් ගොඩ ඒම සඳහා ජපානය ශ්‍රී ලංකාවට ලබා දෙන සහයෝගය පිළිබඳව ජනාධිපතිවරයා මෙහිදී සිය ප්‍රසාදය පළ කළ බවයි ජනාධිපති මාධ්‍ය අංශය කියාසිටියේ.
මේ අතර බෙදීම් ප්‍රතික්ෂේප කිරීමටත් ආර්ථික ඔරොත්තුදීම් සහ සුරක්ෂිතතාවය සඳහා උපාය මාර්ග වෙනුවෙන් හිරෝෂිමා හිදී ජී7 නායකයන් ගත් තීරණ පිළිබඳ ශ්‍රී ලංකාව සිය ප්‍රසාදය පළ කරනවා.
ජනාධිපති රනිල් වික්‍රමසිංහ කියා සිටියේ ජී7 කණ්ඩායම සංවර්ධනය වෙමින් පවතින රටවල් ඇතුළු ගෝලීය හවුල්කරුවන් සමඟ සංවාදයේ යෙදීමට සහ සහයෝගීතා ප්‍රවේශයක් අනුගමනය කිරීමට තීරණය කර ඇති බවයි.
ඒ සඳහා ලෝක වෙළෙඳ සංවිධානයෙහි නීති-පාදක බහුපාර්ශ්වික වෙළඳ ක්‍රමය අනුගමනය කිරීම සුදුසු බව ජනාධිපති රනිල් වික්‍රමසිංහ මහතා ප්‍රකාශ කර තිබෙනවා.
මේ අතර ජනාධිපති රනිල් වික්‍රමසිංහ මහතා ජපානයේ හිටපු අග්‍රාමාත්‍ය යසුඕ ෆුකුඩා සහ ජපාන – ශ්‍රී ලංකා සංගමය විසින් ටෝකියෝ නුවරදී පැවැත්වූ උදෑසන බෝජන සංග්‍රහ හමුවකට සහභාගී වුණා.
එහිදී රටේ ආර්ථික ප්‍රකෘතිය පිළිබඳව කරුණු දැක්වූ ජනාධිපතිවරයා යළි මෙරටට පැමිණ ආයෝජනය කරන ලෙස ජපානයට ආරාධනා කරනු ලැබුවා.
මේ අතර මෙම ශතවර්ෂයේ මැද භාගය වනවිට මුහුදු ජල මට්ටම ඉහළයාම ආසියා පැසිෆික් කලාපයේ බිලියනයකට ආසන්න ජනතාවකට බලපානු ඇතැයි ද ජනාධිපති රනිල් වික්‍රමසිංහ මහතා ප්‍රකාශ කළා.
‘නික්කෙයි’ සමුළුව අමතමින් ඔහු ප්‍රකාශ කළේ දේශගුණික විපර්යාසවලට ගොදුරු වූ රටවල් 15න් 8ක්ම ආසියාවෙන් වීම කණගාටුවට කරුණක් බවයි.
