මහින්දගේ රට ගමන් තහනම ඉවතට

හිටපු ජනාධිපති මහින්ද රාජපක්ෂ ඇතුළු සිව්දෙනකු වෙත පනවා තිබූ විදේශ ගමන් තහනම ඉවත් කරන ලෙස කොළඹ කොටුව මහේස්ත්‍රාත් අධිකරණය අද (17) නියම කළා.

ගාලුමෝදර, ගෝඨා ගෝ ගම අරගලයට පහර දීමේ සිද්ධියට අදාළ විමර්ශන වල දී හිටපු ජනාධිපති මහින්ද රාජපක්ෂ, හිටපු අමාත්‍යවරුන් වන පවිත්‍රා වන්නිආරච්චි, රෝහිත අබේගුණවර්ධන සහ කාංචන ජයරත්න යන අයගේ විදේශ ගමන් තහනම් කිරීමට අධිකරණය නියෝග කර තිබුණා.

අදාළ පැමිණිල්ල අද (17) කොළඹ කොටුව මහේස්ත්‍රාත් අධිකරණය හමුවේ කැඳවූ අවස්ථාවේදී ඔවුන්ගේ නීතිඥවරු අධිකරණය හමුවේ කරුණු දක්වමින් තම සේවාදායකයින් අදාළ නඩුකරයේ සැකකරුවන් වශයෙන් නම් කර නොමැති හෙයින් ඔවුන්ට පණවා තිබෙන විදේශ ගමන් තහනම ඉවත් කරන ලෙස ඉල්ලීමක් කර තිබෙනවා.

එම ඉල්ලීමට අවසර දුන් කොළඹ කොටුව මහේස්ත්‍රාත් තිළිණ ගමගේ මහින්ද රාජපක්ෂ, පවිත්‍රා වන්නිආරච්චි, රෝහිත අබේගුණවර්ධන සහ කාංචන ජයරත්න යන අය වෙත පනවා තිබූ විදේශ ගමන් තහනම ඉවත් කරන ලෙස නියෝග කළා.