පාදුක්ක, වටරැක ගම්මාන පාර ප්‍රදේශයේ දී කාන්තාවකගේ ගෙළ කපා ඝාතනය කර පලායමින් සිටි එකම පවුලේ සහෝදරයෙකු සහ සහෝදරියක් පොලිසිය විසින් අත්අඩංගුවට ගෙන තිබෙනවා.
ප්‍රදේශවාසීන්ගේ ද සහාය ඇතිව මොවුන් අද (09) දහවල් අත්අඩංගුවට ගත් බව මීගොඩ පොලීසිය පවසන්නේ.
වටරැක ගම්මාන පාර ප්‍රදේශයේ නිවසක කුලී පදනම මත පෙදරේරුවෙකු සමග ජීවත් වූ කාන්තාවක් මෙලෙස ඝාතනය කර ඇති බවයි තොරතුරු වාර්තා වුණේ.
මෙලෙස අත්අඩංගුවට ගැනුණු සැකකාර කාන්තාව අදාළ පෙදරේරුවාගේ දික්කසාද බිරිඳවන අතර, අනෙක් පුද්ගලයා ඇයගේ සහෝදරයෙක් බවයි අනාවරණය වී ඇත්තේ.
පෙදරේරුවා දික්කසාද වීමෙන් පසු ඝාතනයට ලක්වූ කාන්තාව සමඟ දිවිගෙවා ඇති බවයි අනාවරණය වී ඇත්තේ.
පෙදරේරුවා අද (09) උදෑසන නිවසින් පිටව ගිය පසු සැකකරු සහ සැකකාරිය ඔහු පදිංචිව සිටි කුලී නිවසට පැමිණ ඇති අතර, අනතුරුව නිවසේ රැඳී සිටි අනියම් බිරිඳ නිවසින් පිටතට ගෙන්වා ගෙන තියුණු ආයුධයකින් ගෙළ කපා ඝාතනය කර ඇති බවයි වාර්තා වන්නේ.
මෙලෙස ඝාතනයට ලක්වූ කාන්තාව වලස්මුල්ල, කටුවන, අළුපොත්දෙණිය ප්‍රදේශයේ පදිංචිව සිටි 52 හැවිරිදි තැනැත්තියක්.
