කටුනායක ගුවන්තොටුපොළේ පහසුකම් වැඩිකිරීම පිළිබඳව සොයා බැලීමට අමාත්ය නිමල් සිරිපාල ද සිල්වා අද එහි හදිසි නිරීක්ෂණ චාරිකාවක නිරත වුණා.
නවීන තාක්ෂණය යොදා ගනිමින් ගුවන්තොටුපොළ කටයුතු තවත් වැඩිදියුණු කිරීම පිළිබඳව මෙහිදී අවධානය යොමු වී තිබෙනවා.
එළඹ ඇති සංචාරක සමයත් සමඟ ශ්රී ලංකාවට පැමිණෙන සංචාරකයින් සංඛ්යාව ද ඉහළ අගයක් ගැනීම හේතුවෙන් පැමිණීමේ පර්යන්තය තුළ මගීන්ගේ තදබදයක් ඇතිව තිබෙන බැවින් එහි පවතින ඉඩකඩ කළමනාකරණය කරමින් උපරිම පහසුකම් සැලසීමටයි ගුවන්තොටුපොළ කළමනාකාරීත්වය කටයුතු කර ඇත්තේ.
ඒ අනුව පැමිණීමේ පර්යන්තයේ ආගමන විගමන කවුලු 25 ක් දක්වා වැඩි කිරිමටත් රටට පැමිණ වීසා ලබා ගැනීම සඳහා පැවති කවුලු දෙකට අමතරව නව කවුලු දෙකක් ස්ථාපිත කිරීමටත් රේගු කටයුතු සඳහා ඉඩ ප්රමාණය වැඩි කිරීමටත් තීරණය කර තිබෙනවා.
පැමිණීමේ පර්යන්තයේ තීරුබදු රහිත සාප්පු සංකීර්ණය ඉඩකඩ ඇති ස්ථානයක ස්ථානගත කිරීම තුළින් සංචාරක මගීන්ට පැවති අවහිරතා ද මගහැරී ඇති අතර විවේකාගාර පහසුකම්ද වැඩිකර ඇති බවයි එහිදී අනාවරණය වුණේ.
නිරීක්ෂණ චාරිකාවෙන් අනතුරුව ගුවන්තොටුපොළ තුළ ආරක්ෂක තත්ත්වය තවදුරටත් තහවුරු කිරීම පිළිබඳව ආරක්ෂක අංශ සහ අදාළ බලධාරින් සමඟ විශේෂ සාකච්ඡාවක ද අමාත්යවරයා නිරත වුණා.
2024 වන විට ගුවන්තොටුපොළ තුළ වීසා ස්කෑන් යන්ත්ර සවි කිරීමට කටයුතු කරන බවයි අමාත්යවරයා ප්රකාශ කළේ.
