කඳුබොඩ ප්රදේශයේ නිවෙසක පවත්වා ගෙන ගිය ශාන්තිකර්ම මධ්යස්ථානයේදී අට හැවිරිදි දැරියක මරුමුවට පත්වීම සම්බන්ධව අත්අඩංගුවට ගත් දැරියගේ මව හා කට්ටඩි කාන්තාව ලබන 13 වැනිදා දක්වා රක්ෂිත බන්ධනාගාරගත කර තැබීමට මහර ප්රධාන මහෙස්ත්රාත් ජී.ඒ.ආර්. ආටිගල මහත්මිය ඊයේ (01 වැනිදා) නියම කළාය.
දෙල්ගොඩ, කඳුබොඩ ප්රදේශයේ පදිංචි කට්ටඩි කාන්තාව වන මොහොමඩ් පාරුක් ලාහිලා පාලිදා (අවු 38) හා දැරියගේ මව වන පාතිමා රික්තා (අවු 40) යන කාන්තාවන් දෙදෙනා මෙසේ රක්ෂිත බන්ධනාගාරගත කෙරිණි.
ඉකුත් සෙනසුරාදා (27 වැනිදා) පස්වරුවේ මෙම දැරියගේ මව විසින් දැරිය එම නිවෙස ආසන්නයේ නිවෙසක පවත්වා ගෙන ගිය ශාන්තිකර්ම මධ්යස්ථානයට අමනුෂ්ය දෝෂයක් දුරු කර ගැනීම සඳහා රැගෙන ගිය අවස්ථාවේ ශාන්තිකර්මය කළ කාන්තාව විසින් දැරියට එකී ශාන්තිකර්මයේදී වේවැලකින් පහර දීමෙන් දැරිය මරුමුවට පත්වී ඇතැයි පැවසේ.
මේ සිද්ධියෙන් මියගොස් ඇත්තේ දෙගොඩ, කඳුබොඩ ප්රදේශයේම පදිංචිව සිටි මොහොමඩ් රිකා පාතිමා රිෆා නමැති අට හැවිරිදි දැරියකි. මේ සිද්ධිය පිළිබඳව මිගහවත්ත පොලිස් ස්ථානාධිපති ප්රධාන පොලිස් පරීක්ෂක නිශාන්ත හේරෙත් හා අපරාධ විමර්ශන අංශයේ ස්ථානාධිපති පොලිස් පරික්ෂක එල්.ඒ. විමලරත්න යන නිලධාරිහු වැඩිදුර පරීක්ෂණ පවත්වති.
අපගේ පෙර පුවත – දේවාලයට රැගෙන ගිය දැරියට වේවැලකින් පහර දී මියයයි
