පසුගිය සතියේ සක්‍රීයව පැවති පිලිපීන ගිනි කන්දකට කඩා වැටුණු කුඩා ගුවන් යානයක සිටි පුද්ගලයින් සිව් දෙනාගේම සිරුරු සහන කණ්ඩායම් කරුවන් විසින් සොයාගෙන තිබෙනවා.
පිලිපීන ගුවන් නියමුවන් දෙදෙනා සහ ඕස්ට්‍රේලියානු මගීන් දෙදෙනෙකු මිය ගිය පිරිස අතර වන බවයි බලධාරීන් තහවුරු කළේ.
ගුවන් යානා සුන්බුන් ගිනි කඳු ආවාටයේ සිට මීටර් 300 (අඩි 985) ක පමණ දුරකින් හමු වී තිබුණා.
පසුගිය ඉරිදා දිනයේ සිට යි ගවේෂණ කණ්ඩායම් මයෝන් ගිනි කන්දේ බෑවුම් ප්‍රදේශයේ මෙහෙයුම්වල නිරත වූයේ.
සිරුරු ආරක්ෂිතව ගොඩ ගැනීමේ අභියෝගයට සහන කණ්ඩායම් දැන් මුහුණ දී සිටිනවා.
පිලිපීන බලධාරීන් පවසන්නේ ගුවන් යානය කඩා වැටීමට හේතුව ද සොයා බැලීමට විමර්ශනයක් ආරම්භ කර ඇති බවයි.
Cessna 340 ගුවන් යානය සෙනසුරාදා අතුරුදහන් වූයේ 2018 දී අවසන් වරට පුපුරා ගිය පිලිපීනයේ වඩාත්ම ක්‍රියාකාරී ගිනිකඳු වලින් එකක් වන මයොන් සිට කිලෝමීටර කිහිපයක් දුරින් පිහිටි ප්‍රාදේශීය ගුවන් තොටුපළකින් මැනිලා බලා පිටත්ව ගොස් ටික වේලාවකට පසුවයි.
ඕස්ට්‍රේලියානු රජය ද අද සිය පුරවැසියන් දෙදෙනාගේ මරණය තහවුරු කර තිබෙනවා. මියගොස් ඇති ඕස්ට්‍රේලියානු ජාතිකයින් දෙදෙනා වන සයිමන් චිපර්ෆීල්ඩ් සහ කාර්ති සන්තානම් පිලිපීන බලශක්ති සමාගමක් වන Energy Corp හි උපදේශකයින් ලෙසටයි සේවය කර ඇත්තේ.
ඕස්ට්‍රේලියානු විදේශ අමාත්‍යවරිය ද අනතුරින් විපතට පත් වූවන්ගේ පවුල්වලට සිය ශෝකය පළ කළා.
මෙය මාස ගණනාවකට පසු පිලිපීනයේදී Cessna ගුවන් යානයක් අතුරුදන් වූ දෙවැනි අවස්ථාවයි.
පළමුවැන්න ජනවාරි 24 වන දින රේඩාර් පද්ධතියෙන් ගිලිහී ගිය අතර එය මෙතෙක් සොයා ගැනීමට හැකිවී නැහැ.
Cessna ගුවන් යානා සාමාන්‍යයෙන් පිලිපීන දූපත් සමූහයේ දූපත් අතර ප්‍රවාහනයට සහ ගුවන් නියමු පුහුණුව සඳහා භාවිතා කරනු ලබනවා.
