උණවටුන ප්‍රදේශයේ හෝටලයක සංචාරකයන්ගේ විදේශ මුදල් සොරකම් කිරීමේ සිද්ධියක් සම්බන්ධයෙන් අවශ්‍යව සිටි සැකකරුවෙකු අත්අඩංගුවට ගැනීමට පොලිසිය මහජන සහාය පතනවා.
පසුගිය ජනවාරි 01 වැනි දින වාර්තා වූ සිද්ධිය සම්බන්ධයෙන් හෝටලයේ හිමිකරු ඇතුළු සැකකරුවන් තිදෙනෙකු අත්අඩංගුවට ගෙන ඇති බවයි පොලිසිය ප්‍රකාශ කළේ.
සැකකරුවන් විසින් එම හෝටලයේ පදිංචිව සිටි රුසියානු කාන්තාවක් සහ තවත් පුද්ගලයින් දෙදෙනෙකුගෙන් ඇමරිකානු ඩොලර් 16,100ක්, රුසියානු රුපියල් 195,000ක් සහ යුරෝ 200ක් සොරකම් කර තිබෙනවා.
නාකියාදෙණිය ප්‍රදේශයේ තවත් 40 හැවිරිදි පුද්ගලයෙකු ඊට සම්බන්ධ බවටයි පරීක්ෂණවලදී අනාවරණ වී ඇත්තේ.
සැකකරු අත්අඩංගුවට ගැනීම සඳහා උණවටුන පොලිසිය පරීක්ෂණ ආරම්භ කර ඇති අතර සැකකරු හඳුනා ගැනීම සඳහා පොලිසිය මහජනතාවගේ සහය ඉල්ලා සිටිනවා.
වල්පිට ගමගේ චන්දන සමන් කුමාර නම් මෙම සැකකරු නාකියාදෙණිය තෙල්ලඹුර උතුර ප්‍රදේශයේ පදිංචිකරුවෙක්.
සැකකරු පිළිබඳ තොරතුරු ඇත්නම් 076 8477810 අංකය ඔස්සේ උණවටුන පොලිසියට දැනුම් දෙන ලෙස මහජනතාවගෙන් ඉල්ලීමක් කෙරෙනවා.
