පේරාදෙණිය විශ්වවිද්යාලයේ හිටපු උපකුලපති මහාචාර්ය අතුල සේනාරත්නට සහ ඔහුගේ පුත්රයා ඇතුළු පවුලේ සාමාජිකයන්ට පහර දී නිල නිවසට අලාභහානි සිදු කිරීමේ සිද්ධියට අදාළව අත්අඩංගුවට ගනු ලැබූ සරසවි සිසුන් 13 දෙනා යළි රක්ෂිත බන්ධනාගාර ගත කර තිබෙනවා.
මහනුවර ප්රධාන මහේස්ත්රාත්වරයා නියෝග කළේ සැකකරුවන් ලබන 18 වනදා තෙක් යළි රක්ෂිත බන්ධනාගාර ගත කරන ලෙසටයි.
මෙලෙස රක්ෂිත බන්ධනාගාර ගත කළ සිසු පිරිස අතර පේරාදෙණිය විශ්වවිද්යාලයේ මහා ශිෂ්ය සංගමයේ හිටපු සභාපති අනුරාධ විදානගේ ද වනවා.
මෙම සිද්ධිය සම්බන්ධයෙන් මහා ශිෂ්ය සංගමයේ වත්මන් සභාපති චමෝත් සත්සර සිසුවා ද අත්අඩංගුවට ගැනීමට නියමිත බවටයි අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේ.
අදාළ සිද්ධිය සම්බන්ධයෙන් පේරාදෙණිය විශ්වවිද්යාලය මගින් සිසුන් 14 දෙනෙකුගේ ශිෂ්යභාවය තාවකාලිකව අත්හිටුවා තිබෙනවා.
පේරාදෙණිය විශ්වවිද්යාලයේ මහා ශිෂ්ය සංගමයේ සභාපති හා හිටපු සභාපති යන දෙදෙනා ගේ ශිෂ්යභාවය පසුගිය 27 දින තාවකාලිකව අත්හිටවනු ලැබුවා.
ඊට දින දෙකකට පසුවයි හිටපු සභාපතිවරයා මහනුවර අධිකරණ සංකීර්ණය ආසන්නයේ දී අපරාධ පරීක්ෂණ දෙපාර්තමේනතුවේ නිලධාරීන් විසින් අත්අඩංගුවට ගනු ලැබුවේ.
හිටපු උපකුලපතිවරයාට සහ ඔහුගේ පවුලේ සාමාජිකයන්ටත්, නිල නිවසටත් පහර දීම සම්බන්ධයෙන් සී.සී.ටී.වී දර්ශන ඔස්සේ හඳුනා ගත් සිසුන් 12 දෙනෙකුගේ ශිෂ්යභාවය පසුගිය 13 දින විශ්වවිද්යාල පාලනාධිකාරිය විසින් අත්හිටුවීමෙන් පසු එම සිසුන් පේරාදෙණිය පොලීසියට භාර වුණා.
රක්ෂිත බන්ධනාගාර ගතකර සිටි එම සිසුන් පසුගිය 22 වැනි දින හඳුනා ගැනීමේ පෙරට්ටුවකට ඉදිරිපත් කළ අතර එහි දී හිටපු උපකුලපති මහාචාර්ය අතුල සේනාරත්න මහතා විසින් සිසුන් 06 දෙනෙකු හඳුනාගෙන තිබෙනවා.
යළිත් සිසුන් සියලු දෙනා රක්ෂිත බන්ධනාගාර ගත කරනු ලැබූ අතර අද නඩුව කැඳවන ලද අවස්ථාවේ සිසුන් වෙනුවෙන් පෙනී සිටි නිතීඥවරු හඳුනා ගැනීමේ පෙරට්ටුවේ දී හඳුනා නොගත් සිසුන්ට හෝ ඇප ලබාදෙන ලෙසටයි ඉල්ලීමක් කළේ.
කෙසේවෙතත් පොදු දේපොළ පනත යටතේ සැකකරුවන්ට එරෙහිව කරුණු වාර්තා කර තිබීමත් සිද්ධියට අදාළව අපරාධ පරීක්ෂණ දෙපාර්තමේන්තුවේ පරීක්ෂණ අවසන්ව නොමැති නිසාත් සිසුන්ට ඇප ලබාදීම මහේස්ත්රාත්වරයා ප්රතික්ෂේප කර තිබෙනවා.
